Жанубий Кореянинг янги ҳужум вертолётларини сотиб олиши ва эскадра мина ташувчиларини қуриши Сеулнинг шимолга ҳужум қилишга тайёргарлиги доирасида амалга оширилмоқда, деб ёзди Шимолий Кореянинг Meari тарғибот сайти. Бу ҳақда «Интерфакс» хабар берди.
2021 йилнинг март ойида Жанубий Корея 2028 йилгача ўзининг мудофаасини кучайтириш мақсадида 36 та ҳужум вертолётини импорт қилишини ва Aegis тизими билан жиҳозланган янги авлод эскадра мина ташувчиларини яратишини эълон қилган эди.
«Жанубий Корея армияси ҳозир ўз қуролли кучларини мустаҳкамлашга эътибор қаратиб, Шимолга узоқ кутилган ҳужум тайёргарлигини тезлаштиришга интилмоқда», — дейилади сайт хабарида.
Хабарда таъкидланишича, Жанубий Корея «иккиюзламачилик позицияси»да турибди, чунки у тинчлик ҳақида гапириб, амалда «шимолдаги ватандошларига имкон қадар кўпроқ зарар етказиш» учун урушга тайёрланяпти.
Meari сайти глобал коронавирус пандемияси сабаб бўлган «аччиқ» ҳақиқатга кўпроқ эътибор қаратиш керак бўлган пайтда қурол-яроғга катта маблағ сарфлаётгани учун Сеулнинг бу режасини «ғайриинсоний ҳаракат» деб қоралади.
Шунингдек, АҚШ разведкасининг маълумот беришича, Шимолий Корея раҳбари Ким Чен Ин ҳам 2021 йилда ядро қуроли ёки узоқ масофага учадиган ракеталарни синовдан ўтказишни қайта бошлаши мумкин.
«АҚШни КХДРга қулай шартлар асосида музокаралар ўтказишга мажбур қилиш учун Ким Чен Ин узоқ масофага учувчи ракеталар ёки ядро қуролларини синовдан ўтказишни қайта бошлаш ҳақида ўйлаётган бўлиши мумкин», — дейилади Америка разведкасининг дунёдаги таҳдидлар тўғрисидаги йиллик ҳисоботида.
«Шимолия Корея армиянинг ядровий қурол билан боғлиқ бўлмаган соҳаларнинг салоҳиятини ҳам такомиллаштиришда давом этмоқда», — деб қўшимча қилди разведка бошқармаси.
Изоҳ (0)