АҚШ президенти Жо Байденнинг одамларга бир неча марта ҳамла қилишга уринган Мейжор (инглизчадан «майор» ёки «катта» деб таржима қилинади) лақабли ити Вашингтонда қўшимча дрессировка курсларидан ўтади. Бу ҳақда АҚШ биринчи хонимининг матбуот котиби Майкл Ларосага таяниб «Интерфакс» хабар берди.
«Хусусий ўқув машғулотлари Вашингтонда бўлиб ўтади, дарсларнинг бир неча ҳафта давом этиши кутилмоқда», — деди Лароса.
Март ойида Мейжор президентнинг Чемп лақабли иккинчи ити билан Байденнинг Делавэр штатидаги уйида ўзини тутиш тартиби бўйича машғулотларни ўтаб, Оқ уйга қайтган эди.
Лекин АҚШ ОАВ маълумотларига кўра, Оқ уйга қайтгач, сайр пайтида Мейжор яна бир кишига ҳамла қилди. Шундай қилиб, Байденнинг президентлиги даврида камида икки киши президент кучукларининг «қурбони»га айланди.
Аввалроқ Оқ уй матбуот котиби Жен Псаки ҳодисани итларнинг ҳали ҳам янги турмуш шароитларига ва янги одамларга кўникиб улгурмагани билан изоҳлади. Унинг сўзларига кўра, шундай ҳодисаларнинг бирида Мейжор «нотаниш одамни кўриб, ҳайратга тушган ва унга ҳамла қилиб, енгил жароҳат етказган".
Байденнинг айтишича, Мейжор Оқ уйда доимо бегона одамларнинг бўлишига кўникиб кетолмаётган «ажойиб ит». «Бурчакдан бурилишнинг ўзи кифоя ва сиз бутунлай нотаниш бўлган одамларга дуч келасиз. Шунинг учун ҳам Мейжор ҳудудни қўриқлашни бошлайди», — деди Байден интервьюлардан бирида.
Маълумот учун, немис овчаркаси Мейжор хавфсизлик ходимини тишлаб олганидан кейин Чемп билан Байденнинг Делавэр штатидаги уйига юборилган эди. Ходим ҳақида тафсилотлар берилмаган. Лекин жароҳат жиддий экани айтилган.
Изоҳ (0)