Паркент кўчасидан Мустақиллик кўчасига ўтиш йўли орадан беш йил ўтиб яна очилди

Мирзо Улуғбек туманидаги Мустақиллик ва Паркент кўчаларини туташтирувчи (эски Пушкин чорраҳаси) йўл фойдаланишга топширилди, деб хабар беради туман ҳокимлиги матбуот хизмати.

Таъкидланишича, ушбу йўлда автоуловлар учун бир қанча қулайликлар яратилган. Хусусан, пиёдалар йўлаги ва йўлдан ўтиш йўлаклари, автоуловларни тартибга солувчи светофор ва ёритиш чироқлари ўрнатилган.

Эслатиб ўтамиз, Мустақиллик кўчасига олиб чиқувчи беш йилдан бери ёпиқ мазкур чорраҳани очиш ишлари январь ойида бошланган эди, бироқ кейинроқ ишлар қоғозбозлик сабаб тўхтаб қолганди.

Таъкидлаш керакки, узоқ йиллар давомида ёпиқ бўлган пойтахтдаги айрим кўчалар Шавкат Мирзиёев президент этиб сайланганидан кейин очилишни бошлади. 2015 йилнинг августида Оққўрғон кўчасидан Мустақиллик томон элтувчи Паркент ҳамда «Буюк ипак йўли» метро бекати йўллари темир панжаралар билан тўлиқ ёпилганди. Ўшанда собиқ Пушкин скверидан қайрилиб олиш ёпилган ва Паркент бозори томон ҳаракатланиш тақиқланган эди.