Ўзбекистон терма жамоаси ярим ҳимоячиси Одил Аҳмедов Хитойнинг «Цанчжоу Майти Лайонс» клуби билан шартнома имзолади. Бу ҳақда чанчжоуликлар клуби матбуот хизмати хабар қилмоқда.
Аҳмедов 2020 йилнинг сентябрида «Шанхай СИПГ»дан «Тяньцзинь Тэда»га ижара асосида ўтганди. Бироқ «Тяньцзинь Тэда» молиявий инқироз сабаб 2021 йил бошида банкротлик эълон қилди.
Авваллари «Шицзячжуан Эвер Брайт» номи билан аталган «Цанчжоу Майти Лайонс» 2020 йилги мавсум якунларига кўра Хитой Суперлигасида сўнгги ўринни олиб, қуйи лигага равона бўлганди. Бироқ «Тясзин Теда»нинг инқирози сабаб, клуб яна олий дивизионга қайтган.
Шу тариқа Аҳмедов яна Хитой Суперлигасида фаолиятини давом эттиради.
Аҳмедов бу вақтга қадар «Пахтакор» (2006—2011), «Анжи» (2011—2014), «Краснодар» (2014—2016) ва «Шанхай СИПГ» (2017—2021) каби жамоаларда тўп сурган.
«Цанчжоу Майти Лайонс» — 2011 йилда ташкил топган бўлиб, уй ўйинларини 31,8 минглик «Цанчжоу Стедиум»да ўтказади.
Хитой Суперлигасининг 2021 йилги мавсуми 20 апрель куни старт олади. Аҳмедовнинг янги жамоаси 21 апрель куни 1-турда «Циндао Ҳуанҳай»га қарши ўтказади.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)