Англия пойтахти Лондон шаҳрининг марказида марҳум шаҳзода Филипп хотирасига ёдгорлик ўрнатиш режалаштирилмоқда. Мамлакатда катта сиёсий кучга эга бўлган Британия парламенти бу таклифни қўллаб-қувватлади, деб ёзмоқда The Telegraph газетаси.
Ёдгорлик Лондон марказида жойлашган Букингем саройи ёнидаги Мэлл кўчасига ўрнатилади. Мамлакат бош вазири Борис Жонсон ҳам катта эҳтимол билан ёдгорлик ўрнатилишини қўллаб-қувватлайди, деб ёзди газета. Шунингдек, мухолифат Лейбористлар партиясининг етакчиси Кир Стармер ҳам ушбу ташаббусни маъқуллади.
Нашр маълумотларига кўра, шаҳзода Филипп ёдгорлигининг ўрнатилиши истаган одам бериши мумкин бўлган хайрия ҳисобидан қисман молиялаштирилади.
Ёдгорлик ўрнатилиши режалаштирилган Мэлл кўчасида қиролича Елизавета II нинг ота-онаси — қирол Георг VI ва унинг турмуш ўртоғи Елизавета Боуз-Лайоннинг ҳам ҳайкаллари жойлашган.
Эдинбург герцоги, Елизавета II нинг турмуш ўртоғи Филипп 9 апрель куни 99 ёшида вафот этди. У Британия қироллик оиласи тарихидаги энг узоқ умр кўрган эркак бўлди, лекин у, шунингдек, 1861 йилда вафот этган Буюк Британия монархининг турмуш ўртоғи шаҳзода Алберт давридан буён қироличадан олдин ҳаётдан кўз юмган биринчи одамга айланди.
Шаҳзода Филиппнинг дафн маросими 17 апрель кунига белгиланган. Пандемияга қарши кураш доирасидаги чекловлар сабабли маросим Виндзор қасрида оила аъзоларининг тор даврасида ўтказилади. Дафн маросимигача Буюк Британияда миллий мотам эълон қилинган.
Изоҳ (0)