«Ювентус» ҳужумчиси Пауло Дибала ПСЖга йўл олиши мумкин.
Туринликлар клуби аргентиналик форвардни ПСЖ ҳужумчиси Мауро Икардига алмаштирмоқчи. «Ювентус» тез орада Икардининг турмуш ўртоғи ва агенти Ванда Нара билан учрашиш ниятида, дея хабар қилмоқда Football Italia.
Таъкидланишича, Дибала ва жамоа ўртасидаги муносабатлар кескинликни сақлаб қолмоқда. Томонлар бир неча ойлик музокаралардан кейин ҳам шартномани узайтириш борасида келиша олмади.
Tuttosport нашрининг хабарига кўра, Дибаланинг Туриндан кетиши масаласи ҳали аниқ эмас. Клуб вакиллари футболчининг агенти билан май ойида учрашади ва Дибала билан шартномани узайтиришга уриниб кўради. Бу музокараларда жамоанинг Чемпионлар Лигаси йўлланмасига эга чиқа олиши асосий ролни ўйнайди.
Дибаланинг «Ювентус» билан амалдаги шартномаси 2022 йилнинг ёзида ўз ниҳоясига етади. Клуб форвардни текинга қўйиб юбормаслик учун у билан келишувни узайтириши ёки ушбу ёзда сотиб юбориши керак.
27 ёшли футболчи А Серия жорий мавсумида 12 та ўйин ўтказиб, учта гол ва иккита голли узатма муаллифига айланди. Икарди эса Лига 1 даги 15 ўйинда 5 гол ва 3 ассистни ўз ҳисобига ёздириб қўйди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)