Россия президенти Владимир Путин ва Озарбайжон президенти Илҳом Алиев телефон орқали гаплашиб, Тоғли Қорабоғ атрофидаги вазиятни муҳокама қилди. Бу ҳақда Кремль матбуот хизмати хабар берди.
Фото: РЕН ТВ
«Россия, Озарбайжон ва Арманистон раҳбарларининг 2020 йил 9 ноябрь ва 2021 йил 11 январдаги баёнотларига мувофиқ, Тоғли Қорабоғ атрофидаги вазиятни янада барқарорлаштириш муҳокамаси давом этди», — дейилади хабарда.
Давлат раҳбарлари минтақада тинчлик, хавфсизлик ва ижтимоий-иқтисодий ривожланишни таъминлаш масалаларини кўриб чиқди, шунингдек, транспорт коммуникациясини қайта тиклашни муҳокама қилди.
2020 йилнинг сентябрь ойи охирида Тоғли Қорабоғда Озарбайжон ва Арманистон давлатлари ўртасида қуролли низо келиб чиққан эди. 2020 йилнинг 10 ноябрида ўт очишни тўхтатиш тўғрисидаги уч томонлама келишув имзоланиши билан низолар якунига етди. Унга кўра, Боку Тоғли Қорабоғ билан қўшни етти вилоят, шунингдек, Шуша ва Гадрут шаҳарлари устидан назоратни қайта тиклади. Ҳудуднинг қолган қисмига Россия тинчликпарварлари жойлаштирилди. Бундан ташқари, келишув Озарбайжон ва Арманистон ўртасидаги алоқалар ва савдо-иқтисодий муносабатларнинг бошланишини назарда тутади.
Январь ойида Россия, Арманистон ва Озарбайжон етакчилари Тоғли Қорабоғни ривожлантириш бўйича қўшма баёнотни имзолади. Баённома минтақадаги иқтисодиёт ва транспорт инфратузилмаси муаммоларини, жумладан, Арманистон ва Россия ўртасидаги темир йўл алоқасини ташкил этиш масалаларини ҳал қилишга қаратилган.
