Шимолий Корея етакчиси Ким Чен Ин мамлакатдаги вазият ҳар қачонгидан ҳам ёмонроқ эканини тан олди. Бу ҳақда Кореянинг Марказий телеграф агентлигига таяниб «Интерфакс» хабар берди.
Фото: «РИА-Новости»
«Партия қурултойининг социалистик иш услубимизни такомиллаштириш, иқтисодий ишларда сезиларли ўзгаришларга ва ривожланишга эришиш, одамларнинг турмуш даражасини яхшилашга қаратилган қарорлари ижроси ҳатто мисли кўрилмаган қийинчиликларни енгиб ўтишимиз керак бўлган бугунги энг ёмон вазиятда ҳам партия қисмларининг бажарадиган ролига боғлиқ», — деди Ким Чен Ин Корея Меҳнат партияси қисмлари котибларининг олтинчи конференциясида.
Шимолий Корея раҳбари партиянинг қуйи синфларини аниқланмаган «камчиликлар» учун танқид қилди ва партия барқарор ва соғлом ривожланиши учун уларни зудлик билан тузатишга чақирди. КХДРдаги партия қисмлари таркибига бешдан 30 тагача одам киради. Бу партиянинг фабрикалар ва бошқа жойлардаги ишларни назорат қилувчи энг кичик бўлинмаларидир.
Associated Press мутахассисларининг фикрича, Шимолий Корея иқтисодиётига пандемиянинг зарбаси, шунингдек, ўнлаб йиллар давомида нотўғри бошқарув таъсири ва АҚШ санкциялари Ким Чен Инни бутун раҳбарлиги давридаги энг қийин аҳволга солиб қўйди.
Февраль ойида Ким Чен Ин ҳукуматни мамлакатдаги иқтисодий таназзуллар учун танқид қилган ва бош иқтисодчини иқтисодиётни сақлаб қолиш учун янги ғоялар таклиф қилмагани сабабли ишдан бўшатган эди.
Таҳлилчиларнинг фикрича, Шимолий Корея иқтисодиётини жонлантириш учун ҳукумат фабрикаларга зарур замонавий ускуна ва технологияларга сармоя киритиши, шунингдек, кўпроқ озиқ-овқат маҳсулотларини импорт қилиши ёки фермер хўжаликлари маҳсулдорлигини ошириши керак. БМТ маълумотларига кўра, 2019 йилда КХДР аҳолисининг 40 фоизида озиқ-овқат тақчиллиги кузатилган.
