АҚШ расмийлари Пекин—2022 қишки Олимпиадасини бойкот қилиш ҳақида ўйламоқда. Бу ҳақда АҚШ Давлат департаменти матбуот хизмати раҳбари Нед Прайс маълум қилди, деб ёзади «РБК».
«Биз бойкот қилиш фикрини иттифоқчиларимиз билан муҳокама қилмоқчимиз», — деди Прайс Олимпиада ҳамкор давлатлар билан биргаликда бойкот қилинадими, деган саволга жавобан.
Аммо кейинчалик Прайс Twitter’да «2022 йилгача ҳали анча бор» деб ёзди, шунинг учун ҳеч қандай қарор қабул қилинмаганини айтди. «Аммо биз умумий муаммоларимизни аниқлаш ва Хитойга умумий ёндашувимизни ишлаб чиқиш учун иттифоқчи ва ҳамкорларимиз билан яқиндан маслаҳатлашишда давом этамиз», — деди у.
Эслатиб ўтамиз, 200 га яқин инсон ҳуқуқларини ҳимоя қилиш ташкилотлари Хитойда ўтказилиши керак бўлган 2020 йилги Олимпиадани бойкот қилишга даъват қилган эди. Бунинг сабаби Шинжон-Уйғур автоном вилоятида инсон ҳуқуқлари оммавий равишда бузилгани ҳақидаги хабарлар бўлиб, уларда миллиондан ортиқ мусулмон уйғурлар асирлик лагерларида сақланаётгани таъкидланган.
АҚШ Давлат департаментининг 30 март куни эълон қилган инсон ҳуқуқлари бўйича йиллик ҳисоботида Хитойнинг Шинжондаги сиёсати «геноцид» деб таърифланди. «Хитой ҳукумат идоралари асосан мусулмон бўлган уйғурларга қарши геноцид ва инсониятга қарши жиноятлар, шу жумладан, қамоқ, қийноқлар, мажбурий стерилизация, уйғурлар ва бошқа диний ҳамда этник озчиликлар вакилларини таъқиб қилиш сингари ҳаракатларни амалга оширмоқда», — дейилади ҳисоботда.
АҚШ аввал ҳам бир марта — 1980 йили Москвада ўтказилган Олимпиадани бойкот қилган эди. Ушбу қарор Совет қўшинларининг Афғонистонга киритилиши туфайли қабул қилинган. АҚШ Миллий олимпия қўмитаси (МОҚ) Конгресс босими остида 1980 йилги Олимпиадани бойкот қилишга қарор қилган, сўнгра АҚШнинг иттифоқчи мамлакатларидаги Олимпия қўмиталари ҳам худди шундай қарорни қабул қилган.
АҚШ МОҚ шу ҳафта бошида бойкотга қарши чиқди. «Бунинг спортчиларга салбий таъсир кўрсатиши аввал исботланган, шу билан бирга, глобал муаммоларни ҳам ҳал қилмайди», — дейилади МОҚ хабарида. «Бизнинг фикримизча, дунё ва Хитой ҳукуматлари учун инсон ҳуқуқлари ва геосиёсий масалалар билан бевосита шуғулланиш анча самарали ҳаракат йўналиши бўлади».
XXIV қишки Олимпия ўйинлари Пекин шаҳрида 2022 йил 4—20 февраль кунлари бўлиб ўтади. 2015 йил 31 июлда Куала-Лумпурда бўлиб ўтган Халқаро олимпия қўмитаси сессиясида Хитой пойтахти навбатдаги ўйинлар ўтказиладиган жой сифатида танланган эди.
Изоҳ (0)