Президент Шавкат Мирзиёев раислигида 8 апрель куни тадбиркорликни ривожлантириш ва 2021 йилда аҳоли бандлигини таъминлаш дастури ижросига бағишланган видеоселектор йиғилиши бўлиб ўтди.
Йиғилиш танқидий-таҳлилий руҳда бошланди. Президент вилоят раҳбарлари, айниқса, туман ҳокимлари тадбиркорликни ривожлантиришдаги камчиликларга йўл қўяётгани, агар уч ой ичида сектор раҳбарлари хулоса қилмаса, ишдан олиниши ҳақида огоҳлантирди, дея хабар бермоқда «Дарё» мухбири.
«Ҳамма ҳудуд ва сектор раҳбарлари бир ҳақиқатни тушуниб олишлари шарт. Янги иш ўринлари яратиш, аҳоли даромади ва харид қобилиятини ошириш учун ҳудудий ва ялпи ички маҳсулот барқарор ўсишини таъминлаш, барчамизнинг энг устувор вазифамиздир. Бу ишларни, албатта, тадбиркорлар амалга оширади», – деди Президент Шавкат Мирзиёев.
Давлат раҳбари сектор раҳбарлари дунёқарашини ўзгартириб, тадбиркор билан дўст бўлиб, янгича ишламаса, натижа ва самара бўлмаслигини алоҳида таъкидлаб ўтди.
«Барча ҳудуд раҳбарларига тадбиркорлик бўйича аҳволи қандайлиги, иқтисодий натижалари ҳақидаги таҳлил ва ҳисоб-китоблар етказилиб, тушунтирилди. Қайси раҳбар қандай ишлаганини ўзи кўриб, хулоса қилиши керак», – деди давлат раҳбари.
Бундан аввал Шавкат Мирзиёев Жанубий Корея парламентининг Миллий Ассамблея спикери бошчилигидаги делегациясини, Россия саноат ва савдо вазири Денис Мантуров бошчилигидаги делегацияни ҳамда Эрон ташқи ишлар вазири Муҳаммад Жавод Зарифни қабул қилгани ҳақида хабар берилганди.
Изоҳ (0)