Германиялик ўспирин дунёдаги энг ёш миллиардерга айланди

Forbes талқинига кўра, 2021 йилда 18 ёшли Дэвид Леманн дунёнинг энг ёш миллиардери бўлди, деб ёзмоқда Business Insider.

Леманн Германиядаги Drogerie Markt  тармоғининг 50 фоиз улушини мерос қилиб олди. Унинг бойлиги 3,3 миллиард долларга баҳоланди.

Дэвид Леман 14 ёшлигида, унинг отаси Гюнтер Леманн ўғлига бизнесдан улуш ажратган. Лекин Дэвид балоғатга етмагунча уларга эгалик қила олмаган. Эндиликда у расман Drogerie Markt  тармоғида отасига тегишли акцияларнинг 50 фоизини мерос қилиб олди.

Business Insider нашрининг ёзишича, компанияга 1974 йилда асос солинган ва ҳозир Германиядаги энг йирик дорихоналар тармоғи ҳисобланади. Компания сайтининг маълумотларига кўра, тармоқ икки мингдан ортиқ савдо нуқталарини бошқаради, компанияда 40 мингдан ортиқ ходим ишлайди.

Forbes маълумотларига кўра, Кевин Леманн ҳам, унинг отаси ҳам компания бошқарувида фаол қатнашмайди ва улар жамоатчилик учун ёпиқ ҳаёт тарзини олиб боради. Нашр улардан изоҳ ололмаган.

Бундай ҳаёт тарзи дунёнинг энг ёш миллиардери мақомининг аввалги эгаси — «Кардашьянлар оиласи» телевизион реалити-шоу иштирокчиси, модель ва Kylie Cosmetics асосчиси Кайли Женнернинг ҳаёт тарзидан кескин фарқ қилади. Кейинроқ унинг бойлиги қайта ҳисобланиб, эълон қилинган Forbes’нинг янги рейтингида Кайли Женнер бу мақомдан маҳрум бўлди. Кайли 2021 йилда бу рўйхатга киритилмади.

2021 йилда энг ёш миллиардерлар рўйхатининг иккинчи ўринини хитойлик 24 ёшли Ван Цзелонг эгаллади. Унинг капитали 1,5 миллиард долларни ташкил қилади. Учинчи ва тўртинчи ўринни норвегиялик опа-сингиллар Александра ва Катарина Андерсен банд қилди. 24 ва 25 ёшдаги опа-сингилларнинг ҳар бири 1,4 миллиард доллар капиталга эга. Улар оилавий Ферд компаниясининг улушига эгалик қилади.

Forbes’нинг ушбу рейтингига бойлиги 1 миллиард доллардан ортиқ бўлган кишилар киритилади. Янги рўйхатга кўра, бугунги кунда дунёда 2755 нафар миллиардер бор, бу ҳар доимгидан кўра кўпроқ кўрсаткич ҳисобланади. Forbes маълумотларига кўра, ўтган йил якунларига кўра, дунё миллиардерларининг умумий бойлиги 8 триллион долларга кўпайган ва ҳозирда бу кўрсаткич рекорд даражадаги 13,1 триллион долларни ташкил этмоқда.