Forbes’ning dunyodagi eng boy odamlar ro‘yxatidan olti nafar qozog‘istonlik o‘rin egalladi

Forbes jurnali dunyoning eng boy odamlari yillik reytingini e’lon qildi. Ro‘yxatga birinchi marta “Kaspi.kz” (Qozog‘istondagi onlayn to‘lovlar platformasi) asoschilari Vyacheslav Kim va Mixail Lomtadze, shuningdek, Freedom Finance (Rossiya investitsiya kompaniyasi) vakili Timur Turlov kiritildi, deb xabar berdi Tengrinews.

Ro‘yxatdan olti nafar qozog‘istonlik milliarder o‘rin oldi. Bu haqda Amerikaning Forbes moliyaviy jurnali va nashr tomonidan yuritiladigan Forbes Real-Time reytingi ma’lumot berdi.

Vladimir Kim

Tadbirkor, KAZ Minerals va “Kazaxmis Xolding” kompaniyalarining prezidenti va yirik aksiyadori Vladimir Kim qozog‘istonlik milliarderlar orasida birinchi o‘rinni band qildi. Uning boyligi 4,6 milliard dollarga baholandi, bu o‘tgan yilgi ko‘rsatkichdan 900 million dollarga ko‘proq. Shunday qilib, u xalqaro ro‘yxatda 622-o‘rinni egalladi.

Tadbirkor 1982-yilda Olmaota arxitektura-qurilish institutini tamomlagan. Sobiq sovet davrida Olmaota tuman partiya qo‘mitasining instruktori, keyinchalik tuman ijroiya qo‘mitasi raisining o‘rinbosari lavozimida faoliyat yuritgan. Mamlakat mustaqillikka erishganidan so‘ng Germaniya, Shveysariya, Janubiy Koreya davlatlarida malaka oshirgan. Texnika fanlari nomzodi. 1998-yili AQShda biznes va ma’muriy boshqaruv yo‘nalishida falsafa doktori darajasini olgan.

Bulat Utemuratov

Qozog‘iston Tennis federatsiyasining prezidenti, ITF (International Tennis Federation — Xalqaro tennis federatsiyasi) vitse-prezidenti va direktorlar kengashi a’zosi Bulat Utemuratov 3,4 milliard dollar kapital bilan qozog‘istonlik milliarderlar orasida ikkinchi va jahon reytingida 891-o‘rinni egalladi. Uning boyligi o‘tgan yildan buyon 700 million dollarga ko‘paydi.

Bulat Utemuratov ForteBank AJning 87,27 foiz ulushiga egalik qiladi. Qozog‘iston Milliy bankining ma’lumotlariga ko‘ra, ForteBank mamlakatning 26 ta banki orasida aktivlarining yirikligi bo‘yicha uchinchi o‘rinda turadi.

Vyacheslav Kim

“Kaspi.kz”ning asoschilaridan biri, aksiyadori va direktorlar kengashi raisi, iqtisodchi Vyacheslav Kim 3,3 milliard dollar boyligi bilan qozog‘istonlik milliarderlar orasida uchinchi o‘rinni band qildi. Shuningdek, xalqaro reytingda 925-o‘rinni egallab, birinchi marta milliarderlar ro‘yxatiga kirdi.

Vyacheslav Kim mobil dastur ko‘rinishidagi Payments, Marketplace va Fintech platformalarini boshqaruvchi “Kaspi.kz” AJning direktorlar kengashi raisi hisoblanadi va uning 25 foiz ulushiga egalik qiladi (IPO chiqarilguncha 36,69 foiz edi). Shuningdek, bu guruhning tarkibiga Kaspi Bank ham kiradi.

Mixail Lomtadze

Texnologiyalar sohasidagi tadbirkor, “Kaspi.kz”ning asoschilaridan biri, aksiyadori va boshqaruv raisi Mixail Lomatdze 3,2 milliard dollar bilan qozog‘istonlik milliarderlar orasida to‘rtinchi o‘rinni egalladi.

Lomtadze Gruziya fuqarosi, lekin uning kapitali Qozog‘istonda bo‘lgani uchun jahon reytingida qozog‘istonlik tadbirkorlar ro‘yxatiga kiritildi. U 2007-yildan buyon Qozog‘istonda yashaydi va “Kaspi.kz”ning 23 foiz oddiy aksiyalariga egalik qiladi. Avvalroq u Qozog‘istondagi eng yaxshi rahbar sifatida e’tirof etilgan edi.

Timur va Dinara Kulibayevalar

Qozog‘istonlik milliarderlar orasida beshinchi va xalqaro ro‘yxatda 1111-o‘rinni band qilgan Timur va Dinara Kulibayevalarning kapitali har ikkisida ham 2,8 milliard dollarga baholandi. Dinara Kulibayeva va uning turmush o‘rtog‘i “Xalq Banki” AJga tegishli oddiy aksiyalarning 64,5 foiziga egalik qiladi.

Timur Turlov

Tadbirkor 2,2 milliard dollar kapital bilan birinchi marta Forbes reytingiga kiritildi va qozog‘istonliklar orasida oltinchi, jahon reytingida 1517-pog‘onani egalladi. Timur Turlov Rossiya fuqarosi, lekin oilasi bilan Olmaotada yashaydi. U 14 yildan ortiq vaqt mobaynida xalqaro investitsiyalar sohasida faoliyat yuritib keladi va AQSh fond birjalari bo‘yicha mutaxassis hisoblanadi. Uning faoliyati aktivlar majmuasini boshqarish va cheklangan tavakkalchilik bilan samarali strategiyalarni ishlab chiqishga ixtisoslashgan, dolzarb investitsion g‘oyalar bo‘yicha mualliflik seminarlari o‘tkazadi. Freedom Finance kompaniyasiga asos solishidan avval u “Yutreyd”, “Nettreyder” kompaniyalarida xalqaro bozorlar bo‘limini boshqargan.

Ma’lumot uchun, Forbes reytingida Amazon asoschisi Jeff Bezos hamda SpaceX va Tesla asoschisi Ilon Mask yetakchilik qilmoqda.