«Фуқаролар раҳбарлар ва мутасаддилар ‘кўзини қўрқитиб қўйиш’ мақсадида қўйларни ҳокимлик ҳудудига ҳайдаб келган» — «Қўйлар митинги» бўйича вилоят прокуратураси изоҳ берди

6 апрель куни Самарқанд вилоятининг Нуробод туманида истиқомат қилувчи фуқаролар томонидан маҳаллий ҳокимлик биноси ҳудудига қўйлар ҳайдаб келинганди. «Халқ сўзи Онлайн»нинг вилоят прокуратурасига таяниб, маълум қилишича, содир этилган норозилик намойиши тўлиқ ўрганилган.

Ўрганишлар натижасида, тумандаги «Қиличли» маҳалла фуқаролар йиғинида истиқомат қилувчи фуқаролар томонидан яйловлардан ижара шартномаларисиз бепул фойдаланиш илинжида мазкур яйлов майдонида 4 минг бошдан ортиқ қўйлар боқилаётгани важ қилиб кўрсатилиб, кластер раҳбарлари ва мутасадди ташкилотлар «кўзини қўрқитиб қўйиш» мақсадида фермер хўжалигига тегишли бўлган 1450 бош қўйлар туман марказида жойлашган Нуробод тумани ҳокимлиги ҳудудига ҳайдаб келингани аниқланган.

Шундан сўнг, вилоят прокурори Равшан Машарипов, Республика «Қоракўлчилик» уюшмаси раиси Эркин Хайитов ва бошқа мутасадди ташкилотлар раҳбарлари билан биргаликда кенг жамоатчилик, ОАВ вакиллари ва оқсоқоллар иштирокида маҳаллий аҳоли билан учрашиб, қоракўлчилик тармоғида амалга оширилаётган ислоҳотлар бўйича суҳбат ўтказиб, яйловлардан фойдаланиш тартиби ва ҳуқуқий асослари тушунтирилган.

Коррупцияга қарши курашиш агентлигининг маълумотларига кўра, юқоридаги ҳолат бўйича Самарқанд вилояти Нуробод тумани «Ағрон» маҳалласида яшовчи фуқаро Ж.Я.нинг мурожаати ўрганилган. Тегишли ҳужжатларни ўрганишлар давомида Нуробод туман ҳокими қарор қабул қилишда қишлоқ хўжалигига мўлжалланган ерларни бериш ва яйловлардан фойдаланиш тартибини белгиловчи норматив-ҳуқуқий ҳужжатлар талабларига риоя этилмагани маълум бўлган.

Жумладан, Нуробод туман ҳоким қарорига асосан «А.И.С.» МЧЖга Нуробод тумани Тошқудуқ массивидаги 2118к, 2119к, 2120к, 2121к ва 2122к контурларда жойлашган яйлов ер майдонлари лалмикор ер сифатида ғаллачилик билан шуғулланиш учун ажратилган. Ушбу контурлардаги ер майдонлари Давлат солиқ қўмитаси ҳузуридаги Кадастр агентлигининг 2021 йил 27 мартдаги 01002-сонли хатида узоқ йиллардан буён фойдаланилмаган ва экин экилмаган яйлов ер майдонлари экани ҳам кўрсатилган.

Ўрганишлар ва Нуробод туман ҳокимлиги масъуллари билан олиб борилган тегишли ҳаракатлар натижасида туман ҳокимининг қарори бекор қилиниб, Нуробод тумани Тошқудуқ массивида жойлашган яйлов ер майдонлари туман ҳокимлиги захирасига олинган.