Наманган вилоятининг Мингбулоқ тумани ва Сирдарё вилоятининг Сайхунобод тумани ҳокимликларида лавозим ўзгаришлари амалга оширилди. Бу ҳақда «Дарё» мухбири Азизбек Абдувалиев хабар бермоқда.
Жорий йил 5 апрель куни Мингбулоқ тумани ҳокимининг ўринбосари — инвестициялар ва ташқи савдо бўлими бошлиғи Шуҳрат Умаралиев ротация асосида Сайхунобод тумани ҳокими ўринбосари — туман инвестициялар ва ташқи савдо бўлими бошлиғи лавозимига тайинланди.
Шуҳрат Умаралиев 1983 йилда Наманган шаҳрида туғилган. 2006 йилда Наманган давлат университети, 2017 йили Президент ҳузуридаги Давлат бошқаруви академиясини тамомлаган.
У 2018 йилдан ҳозирга қадар Мингбулоқ тумани ҳокимининг ўринбосари — инвестициялар ва ташқи савдо бўлими бошлиғи лавозимида ишлаб келаётган эди.
6 апрель куни Сирдарё вилоятининг Сайхунобод тумани ҳокими ўринбосари — туман инвестициялар ва ташқи савдо бўлими бошлиғи Зиёдулла Каримов Мингбулоқ тумани ҳокимининг ўринбосари—инвестициялар ва ташқи савдо бўлими бошлиғи лавозимига ротация асосида тайинланди.
Зиёдулла Каримов 1979 йили Сирдарё вилоятининг Сайхунобод туманида туғилган. 2001 йилда Ўзбекистон миллий университети, 2007 йилда Тошкент молия институти, 2010 йилда Президент ҳузуридаги Давлат ва жамият қурилиши академиясини тамомлаган.
У 2019 йилдан ҳозирга қадар Сирдарё вилояти Сайхунобод тумани ҳокими ўринбосари — туман инвестиция ва ташқи савдо бўлими бошлиғи лавозимида ишлаб келаётган эди.
Давлат хизматини ривожлантириш агентлиги Наманган вилоят филиали раҳбари Шуҳратжон Тўхтабоевгага кўра, агентлик ташаббуси билан ўрта бўғин раҳбарлари бошқарув кўникмаларини ошириш, уларни ўз устиларида ишлашларига имконият яратиш, юқори натижаларга эришган шаҳар-туман ҳокимлари ўринбосарларини юқори лавозимларга тавсия этиш мақсадида ротация қилиш механизмини жорий этиш таклифи ишлаб чиқилган.
Президентнинг жорий йил 18—19 февраль кунлари Наманган вилоятига ташрифи чоғида ушбу таклиф қўллаб-қувватланиб, Давлат хизматини ривожлантириш агентлиги ҳамда Наманган ва Сирдарё вилояти ҳокимликлари ўртасидаги ўзаро меморандум асосида шаҳар-туман ҳокимлари ўринбосарлари даражасида тажриба алмашишни йўлга қўйиш кўзда тутилган кадрларни муддатли ротация қилиш механизмини жорий этиш вазифаси белгилаб берилди.
Ротация асосида лавозимга тайинланган ҳоким ўринбосарлари 1 йил мобайнида янги ҳудудда фаолият олиб боради.
«Давлат хизматини ривожлантириш агентлиги ушбу меморандум ижроси юзасидан мониторинг олиб боради. Энг муҳим самарадорлик кўрсаткичлари (ЭМСК) асосида ҳоким ўринбосарлари фаолиятининг натижадорлигини баҳолайди. Юқори натижадорликка эришган ҳоким ўринбосарлари давлат органлари ва ташкилотларининг юқори лавозимларига тавсия этиш мақсадида Миллий кадрлар захирасига киритилади», — дейди Шуҳратжон Тўхтабоев.
Изоҳ (0)