Forbes журнали дунёнинг энг бой одамлари йиллик рейтингини эълон қилди. Рўйхатга биринчи марта «Kaspi.kz» (Қозоғистондаги онлайн тўловлар платформаси) асосчилари Вячеслав Ким ва Михаил Ломтадзе, шунингдек, Freedom Finance (Россия инвестиция компанияси) вакили Тимур Турлов киритилди, деб хабар берди Tengrinews.
Рўйхатдан олти нафар қозоғистонлик миллиардер ўрин олди. Бу ҳақда Американинг Forbes молиявий журнали ва нашр томонидан юритиладиган Forbes Real-Time рейтинги маълумот берди.
Владимир Ким
Тадбиркор, KAZ Minerals ва «Казахмис Холдинг» компанияларининг президенти ва йирик акциядори Владимир Ким қозоғистонлик миллиардерлар орасида биринчи ўринни банд қилди. Унинг бойлиги 4,6 миллиард долларга баҳоланди, бу ўтган йилги кўрсаткичдан 900 миллион долларга кўпроқ. Шундай қилиб, у халқаро рўйхатда 622-ўринни эгаллади.
Тадбиркор 1982 йилда Олмаота архитектура-қурилиш институтини тамомлаган. Собиқ совет даврида Олмаота туман партия қўмитасининг инструктори, кейинчалик туман ижроия қўмитаси раисининг ўринбосари лавозимида фаолият юритган. Мамлакат мустақилликка эришганидан сўнг Германия, Швейцария, Жанубий Корея давлатларида малака оширган. Техника фанлари номзоди. 1998 йили АҚШда бизнес ва маъмурий бошқарув йўналишида фалсафа доктори даражасини олган.
Булат Утемуратов
Қозоғистон Теннис федерациясининг президенти, ITF (International Tennis Federation — Халқаро теннис федерацияси) вице-президенти ва директорлар кенгаши аъзоси Булат Утемуратов 3,4 миллиард доллар капитал билан қозоғистонлик миллиардерлар орасида иккинчи ва жаҳон рейтингида 891-ўринни эгаллади. Унинг бойлиги ўтган йилдан буён 700 миллион долларга кўпайди.
Булат Утемуратов ForteBank АЖнинг 87,27 фоиз улушига эгалик қилади. Қозоғистон Миллий банкининг маълумотларига кўра, ForteBank мамлакатнинг 26 та банки орасида активларининг йириклиги бўйича учинчи ўринда туради.
Вячеслав Ким
«Kaspi.kz»нинг асосчиларидан бири, акциядори ва директорлар кенгаши раиси, иқтисодчи Вячеслав Ким 3,3 миллиард доллар бойлиги билан қозоғистонлик миллиардерлар орасида учинчи ўринни банд қилди. Шунингдек, халқаро рейтингда 925-ўринни эгаллаб, биринчи марта миллиардерлар рўйхатига кирди.
Вячеслав Ким мобил дастур кўринишидаги Payments, Marketplace ва Fintech платформаларини бошқарувчи «Kaspi.kz» АЖнинг директорлар кенгаши раиси ҳисобланади ва унинг 25 фоиз улушига эгалик қилади (IPO чиқарилгунча 36,69 фоиз эди). Шунингдек, бу гуруҳнинг таркибига Kaspi Bank ҳам киради.
Михаил Ломтадзе
Технологиялар соҳасидаги тадбиркор, «Kaspi.kz»нинг асосчиларидан бири, акциядори ва бошқарув раиси Михаил Ломатдзе 3,2 миллиард доллар билан қозоғистонлик миллиардерлар орасида тўртинчи ўринни эгаллади.
Ломтадзе Грузия фуқароси, лекин унинг капитали Қозоғистонда бўлгани учун жаҳон рейтингида қозоғистонлик тадбиркорлар рўйхатига киритилди. У 2007 йилдан буён Қозоғистонда яшайди ва «Kaspi.kz»нинг 23 фоиз оддий акцияларига эгалик қилади. Аввалроқ у Қозоғистондаги энг яхши раҳбар сифатида эътироф этилган эди.
Тимур ва Динара Кулибаевалар
Қозоғистонлик миллиардерлар орасида бешинчи ва халқаро рўйхатда 1111-ўринни банд қилган Тимур ва Динара Кулибаеваларнинг капитали ҳар иккисида ҳам 2,8 миллиард долларга баҳоланди. Динара Кулибаева ва унинг турмуш ўртоғи «Халқ Банки» АЖга тегишли оддий акцияларнинг 64,5 фоизига эгалик қилади.
Тимур Турлов
Тадбиркор 2,2 миллиард доллар капитал билан биринчи марта Forbes рейтингига киритилди ва қозоғистонликлар орасида олтинчи, жаҳон рейтингида 1517-поғонани эгаллади. Тимур Турлов Россия фуқароси, лекин оиласи билан Олмаотада яшайди. У 14 йилдан ортиқ вақт мобайнида халқаро инвестициялар соҳасида фаолият юритиб келади ва АҚШ фонд биржалари бўйича мутахассис ҳисобланади. Унинг фаолияти активлар мажмуасини бошқариш ва чекланган таваккалчилик билан самарали стратегияларни ишлаб чиқишга ихтисослашган, долзарб инвестицион ғоялар бўйича муаллифлик семинарлари ўтказади. Freedom Finance компаниясига асос солишидан аввал у «Ютрэйд», «Нэттрэйдер» компанияларида халқаро бозорлар бўлимини бошқарган.
Маълумот учун, Forbes рейтингида Amazon асосчиси Жефф Безос ҳамда SpaceX ва Tesla асосчиси Илон Маск етакчилик қилмоқда.
Изоҳ (0)