Jons Hopkins universiteti ma’lumotlariga ko‘ra, dunyoda koronavirus bilan kasallanganlar soni 133 195 909 kishiga yetdi, shularning 2 889 746 nafari vafot etdi. COVID-bemorlar soni bo‘yicha birinchi beshlikdan AQSh (30,9 million kishi), Braziliya (13,1 million), Hindiston (12,9 million), Fransiya (4,9 million) va Rossiya (4,5 million) o‘rin olgan.
Kolumbiyada 104 yoshli ayol ikki marta COVID-19’ga chalinib, ikki marta ham uni yengishga muvaffaq bo‘ldi. Karmen Ernandes birinchi marta o‘tgan yilning iyunida koronavirusdan sog‘aygan edi. O‘shanda bemor o‘zi 25 yildan buyon yashayotgan qariyalar uyida boshqa bemorlar bilan yakkalab qo‘yilgan edi. Shu yilning 27-fevralida Ernandes koronavirusga qarshi emlangan bo‘lsa-da, 8-mart kuni unda virus aniqlandi. Shifokorlar aytishicha, bunday qisqa muddatda immunitet shakllanishga ulgurmagan.
Ayol 19-mart kuni kasalxonaga yotqizildi. Intensiv davolash bo‘limida u sun’iy nafas oldirish apparatiga ehtiyoj sezmagan holda mustaqil nafas ololdi. 5-aprel kuni Ernandes shifokorlar olqishlari ostida kasalxonadan chiqdi va qariyalar uyiga qaytdi. U Kolumbiyada koronavirusdan sog‘aygan eng keksa odamga aylandi.
Qozog‘istonda o‘tgan bir kecha-kunduzda (7-aprel holatiga) 2586 kishida koronavirus aniqlandi. Bu rekord ko‘rsatkich deb baholandi. Bir kun avval 2080 kishi kasallikka chalingan edi. Shu tariqa, mamlakatda koronavirus yuqtirish holatlari jami 261 503 taga yetdi. Eng ko‘p bemorlar Olmaota (710 kishi) va Nur-Sulton (578) shaharlarida hamda Olmaota viloyatida (325) qayd etildi.
Tokio ma’murlari Yaponiya hukumatidan COVID-19 tarqalishiga qarshi kurashish uchun favqulodda cheklov choralarini kiritish uchun ruxsat so‘radi.
Yaponiya poytaxtida favqulodda vaziyat rejimi yanvarda bekor qilingan edi. Gubernator Yuriko Koikening so‘zlariga ko‘ra, “Tokioning Osakadagidek vaziyat bilan to‘qnash kelishi vaqt masalasi, xolos”. Osakada yaqinda kasallanishning yuqori darajasi tufayli favqulodda holat e’lon qilingan va Olimpiada mash’ali estafetasini ushbu prefekturada tomoshabinlarsiz o‘tkazishga qaror qilingan edi. Koikening aytishicha, 9-aprel kuni yangi choralarning tafsilotlari muhokama qilinishi mumkin.
Yaponiyada koronavirus bilan kasallanish darajasining o‘sishga moyilligi kuzatilmoqda. O‘tgan bir kecha-kunduzda 3,4 ming kishida virus aniqlangan, butun pandemiya davrida kasallanganlar soni 494 mingga yetgan.
Litvada ham yangi kasallanish holatlari soni o‘smoqda. Mamlakat yaqin haftalar ichida “qora hudud”ga kirib qolishi mumkin, deb ma’lum qildi sog‘liqni saqlash vaziri Arunas Dulkis. “Qora hudud” — 14 kun mobaynida yangi kasallanish holatlari har 100 ming aholiga 500 tadan oshganda yuzaga keladigan vaziyatdir. Ayni vaqtda musbat testlar ulushi 10 foizdan oshishi kerak.
Litvada o‘tgan ikki haftada kasallanish darajasi har 100 ming aholiga 382,3 tani tashkil qilgan. Musbat javobli testlar ulushi bir haftada 7,5 foizga yetgan. Eng jiddiy vaziyat Vilnyusda kuzatilmoqda. Bu yerda kasalxonaga yotqizilganlar soni bir haftada 30 foizga oshgan. Shuningdek, Kaunas shahrida ham vaziyat yomonlashishni boshlagan.
Buyuk Britaniyada AstraZeneca vaksinasi bilan emlangandan keyin tromblar hosil bo‘lishi bilan bog‘liq 79 ta holat aniqlandi, shularning 19 tasi bemorlarning o‘limi bilan tugadi. Marhumlarning 11 nafari 50 yoshdan kichik bo‘lgan, yana uch kishi 30 yoshga ham to‘lmagan bo‘lgan.
Vaksinatsiyadan keyin tromboz hosil bo‘lgan 79 kishining barchasi AstraZeneca dorisining birinchi dozasini olgan, xolos.
Buyuk Britaniya Angliya-Shvetsiya vaksinasining eng yirik xaridori bo‘lib, u Yevroittifoqqa eksport qilingan 42 million dozaning 10 milliontasini zaxira qilib qo‘ygan.
Izoh (0)