Туркия суди тўрт кишини 2016 йил 12 нафар германиялик сайёҳларнинг ўлимига сабаб бўлган Истанбулдаги терактларда айбдор деб топди ва уларни бир умрлик қамоқ жазосига ҳукм қилди. Бу ҳақда Hurriyet Daily News хабар берди.
Фуқаролигига аниқлик киритилмаган тўрт нафар эркак бир умрга озодликдан маҳрум қилинди. Бошқа 18 нафар гумондор эса бу иш бўйича оқланди.
2016 йилнинг январь ойида шаҳарнинг сайёҳлар энг кўп ташриф буюрадиган диққатга сазовор жойларидан бўлган Мовий масжид ва Ая София ёнидаги Султон Аҳмад майдонида портлаш содир бўлган эди.
Ўшанда Туркия ҳукумати теракт учун жавобгарликни ИШИД зиммасига юклаган бўлсада, жангарилар воқеага алоқадорлиги масаласида ҳеч нарса демаган.
Маълумот учун, 2016 йилнинг 12 январь куни тонгда Истанбул марказида жойлашган Султон Аҳмад майдонидаги бир гуруҳ сайёҳлар бўлган автобус бекатига яқин жойда портлаш содир этилган эди. Кейинроқ хабар берилишича, Туркия ОАВларига бу ҳақда ёзиш тақиқланган. Шунингдек, гид туристларнинг бир қисмини қутқариб қолгани маълум қилинган.
Аввалроқ Мозамбикнинг шимоли-шарқида жойлашган Палма шаҳрига қуролланган жангарилар ҳужум қилгани ҳақида хабар берилди. Энг камида 57 киши ҳалок бўлди, улар орасида чет эл фуқаролари ҳам борлиги айтилмоқда.
Шунингдек, Малининг шимолида жангарилар ҳарбий базалардан бирига ҳужум қилди. Оқибатда 33 нафар ҳарбий ҳалок бўлгани ҳақида маълумот берилди. Мамлакат Мудофаа вазирлигининг маълумотларига кўра, 15 март куни Ансанго туманидан 60 километр узоқликда жойлашган Тессит аҳоли пунктидаги ҳарбий қисмга қуролланган террорчилар ҳужум қилган.
Индонезиянинг Сулавеси оролидаги Макасар шаҳрида эса икки нафар худкуш католик черкови дарвозаси ёнида портлаш уюштирди. Полиция маълумотларига кўра, 14 киши жабрланган. Ҳозирча воқеа юзасидан ҳеч ким жавобгарликни ўз зиммасига олмаган.
Изоҳ (0)