Левандовскисиз «немис машинаси» Неймари ва Мбаппеси бор парижликларга қарши. «Бавария» — ПСЖ учрашуви ҳақида

Футбол бўйича Европа Чемпионлар Лигасининг чорак финал босқида 7 апрель, чоршанба куни «Бавария» ўз майдонида ПСЖни қабул қилади. Ўтган мавсумдаги финалчилар бу сафар 1/4 финал босқичидаёқ ўзаро тўқнаш келади. Битта ўйиндан иборат бўлган (финал) беллашувда «немис машинаси» ПСЖнинг юлдузларини жамоавий ўйин ва тўғри тактика эвазига таслим этганди. Орадан салкам бир йил вақт ўтди, аммо «Бавария» кучайса кучайдики, асло заифлашгани йўқ. Худди шундай ҳолат ПСЖда ҳам кузатилди дейиш мумкин. Париж клуби, гарчи ички чемпионатда пешқадам «Лилль»дан ортда қолаётган бўлса-да, жамоада ижобий муҳит ҳукм сурмоқда. Янги мураббий — Маурисио Почеттино юлдузлар билан тезда тил топишиб кетди. Шундай экан, бугунги баҳсда жамоалардан ҳужумкор ва ёрқин ўйинни кутиш ўринли. Қуйида ушбу баҳс атрофидаги воқеаларга батафсил тўхталиб ўтилади.

Мусобақа йўли

ПСЖ эса қийин гуруҳдан жой олганди. Жамоа «Манчестер Юнайтед», «Лейпциг» ва «Истанбул» билан кураш олиб борди. Парижликлар икки марта мағлубиятга учраган бўлишига қарамай, гуруҳда биринчи ўринни эгаллашга муваффақ бўлди. 1/8 финалда Маурисио Почеттино жамоаси икки ўйин натижасига кўра «Барселона»дан устун келди.

Асосий воқеликлар

1. Роберт Левандовски «Бавария»га ёрдам бера олмайди. ФИФА кунларида ўтказилган ЖЧ—2022 саралаши ўйинлари сабаб Флик катта муаммога дуч келди. Левандовски бир ой муддатга сафдан чиқди. Сўнгги бир неча мавсумдан бери Мюнхен клуби форвардни бунчалик катта муддатга йўқотмаган эди. Ушбу вазиятда унинг ўрнини ким эгаллайди деган савол кун тартибига чиқиши табиий. Шу ўринда таъкидлаш жоиз, унинг ўрнини босиш осон кечмайди, боиси польшалик кетма-кет бир неча мавсум давомида даҳшатли ўйин кўрсатиб келмоқда.

Ўтган дам олиш кунларида «Бавария» «Лейпциг»га қарши ўйин ўтказди, ҳужум чизиғида парижликларга таниш бўлган Эрик Шупо-Мотинг ўйнади. Жамоа ўйинда ғалаба қозонди, аммо олдинга чизиқда ҳайрон қоларли нимадир кўзга ташланмади. Иккинчи вариант Серж Гнабри бўлиши мумкин эди, аммо 6 апрель куни унда коронавирус аниқлангани маълум бўлди. Шунингдек, керакли вақтда керакли жойда бўлишни биладиган Леон Горетцкани ҳам унутмаслик керак. Айнан у «Лейпциг»га қарши ўйинда ғалаба голини урди. Флик Томас Мюллерни олдинроқ силжитиши мумкинлигини ҳам истисно қилмаслик лозим. Ҳанс Флик қайси вариантни танласа ҳам, Левандовскининг йўқлигини билинтирмаслик жуда қийин кечади.

2. Чап қанот ҳимоясида ким майдонга тушади? «Бавария» бош мураббийи ҳужум масаласи билан бир қаторда ҳимоя ҳақида ҳам бош қотириши керак бўлади. Фақат бу сафар у ёқимли «бош оғриқ»қа дуч келди. Флик франциялик Люка Эрнандес ва ёш канадалик иқтидор эгаси Альфонсо Дэвисдан бирини танлаши керак бўлади.

Жароҳатлари сабаб Мюнхен клубининг асосий таркибига кира олмаётган француз ушбу мавсумда Дэвиснинг жароҳатидан фойдаланиб, мураббийга майдонда нималарга қодир эканини исботлади. Эрнандес Бундеслиганинг жорий мавсумида 18 ўйинда қатнашиб, шундан 13 тасида асосий таркибда майдонга тушди, яна бешта баҳсда эса у захирадан ўйинга қўшилди. Чемпионлар Лигасида бу кўрсаткич 8 та ўйинга тенг (бешта асосий, учта захира). Франциялик футболчи табиийки кўпроқ ўйнашни хоҳлайди, аммо тезкор ва меҳнатсевар Дэвисни рақобатда енгиб чиқиш унчалик ҳам осон иш эмас. Шундай экан, агар Дэвис соғлом бўлса, унинг бошланғич таркибдан жой олиш эҳтимоли анча юқори.

ПСЖ

1. ПСЖ Мюнхенга беш нафар асосий ўйинчисиз келди. ПСЖ бу мавсумда жароҳатлар ва коронавирусдан жуда кўп азият чекмоқда. Маурисио Почеттино жамоага келганидан бери ҳали тўлиқ таркиб билан ўйин ўтказгани йўқ. Эҳтимол, кучли бешлик чемпионатларидаги бирорта жамоада парижликлар бу каби доимий муаммолар мавжуд эмас.

«Бавария» билан ўйинда ПСЖга бирданига бешта ўйинчи ёрдам бера олмайди. Парижликлар учун энг катта йўқотиш – Марко Верраттининг ўйинни ўтказиб юбориши бўлади. Почеттино италияликдан «ўнинчи рақам» ролида фойдаланарди, унинг йўқлиги мураббийни тактик ўзгаришларни амалга оширишга мажбур қилиши аниқ. Айнан Верратти Париж клубининг позицион ҳужумларида «мия» вазифасини бажариб берарди. Майдон марказидаги иккинчи жиддий йўқотиш Леандро Паредес бўлди, унда сариқ карточкалар сони кўпайиб кетган. Ҳимояда ҳам жамоада ўзига хос муаммолар бор. Алессандро Флоренци миллий терма жамоадаги ўйинлардан сўнг коронавирусга чалинди, Левен Кюрзава эса жароҳат олган. Таркибда иккаласининг ўрнини босувчи ўйинчилар бор, аммо буларни тенг кучли алмаштиришлар деб атаб бўлмайди. Иккала футболчи ҳам жамоанинг ҳужумларида иштирок этиб, рақиб ҳимоячиларига етарли даражада муаммолар туғдирарди. Шунингдек, Мауро Икарди ҳам жароҳати туфайли мазкур ўйинни ўтказиб юборади.

2. ПСЖнинг руҳий ҳолати муҳим рол ўйнаши мумкин. Неймар жароҳатидан фориғ бўлиб, қайтди. Аммо қайтганидан кейинги ўйинлар ҳам Неймар, ҳам жамоа учун омадсиз кечди. Ҳатто қизил карточка ишлаб олишга ҳам улгурди ва яна бир бор танқидлар «ёмғири» остида қолди. Исталган натижага эришиш учун Почеттино керакли сўзларни топиши ва Неймарнинг худбинлигини жиловлаши керак бўлади. Почеттино билан алоҳида ишлаши керак бўлган иккинчи шахс, бу Тило Керердир. Айнан у Флоренцининг йўқлигини билинтирмаслиги лозим. Керер «Лилль»га қарши ўйинни тўлалигича муваффақиятсиз ўтказди, ҳужумларнинг аксарияти ҳам айнан унинг қанотидан (ўнг) уюштирилди.

Париждан кетишдан олдин Томас Тухель жамоа бош мураббийи нафақат ўзининг бевосита вазифасини бажариши, балки сиёсатчи ва руҳшунос ҳам бўлиши кераклигини айтганди. Ўз жамоасини бир мақсад йўлида йўналтириш — Почеттинонинг асосий вазифаларидан бирига айланади. Айнан ушбу учрашув унинг юлдузли кийиниш хонасини қай даражада бошқара олаётганини кўрсатиб беради.

Жамоаларнинг сўнгги 10 та ўйиндаги статистикаси:

Тахминий таркиблар:

ПСЖ кучли ҳимояга эга ва, албатта, олдинги чизиқда ажойиб ўйинчилари бор. Биз уларга тўпнинг етказиб берилишига йўл қўймаслигимиз керак. Бундан ташқари тўғри прессинг қўллашимиз зарур. Аввалги финалда Мануэль Нойер ажойиб ўйин кўрсатганди. ПСЖ ҳужумчилари бу ҳақида ўйлаяптими ё йўқ буни билмайман. Аммо дарвозада жаҳон даражасидаги посбон борлиги бизнинг устунлигимиздир.Ҳанс Флик, «Бавария» бош мураббийи

Биз Европа ва Жаҳон чемпионлари билан ўйнаймиз. Уларни ҳурмат қиламиз, лекин ўз имкониятларимизга ҳам ишонамиз. Биз бу эрга ғалаба қозониш учун келдик. Неймар ва Мбаппе ҳақида кўп гапирилади, аммо ишонаманки, таркибга киритилган барча 11 футболчи ғалабамиз учун зарур бўлган ишни қилади.

Маурисио Почеттино, ПСЖ бош мураббийи