Фарғона вилояти Риштон туманидаги Хизр бува зиёратгоҳида одамларнинг пулларини ўғирлаган шахс қўлга олинди, дея хабар қилмоқда Тергов департаменти.
Қайд этилишича, 2021 йилнинг 2 апрель куни соат 11:30 ларда номаълум шахс Риштон тумани «Бўстон» маҳалласида жойлашган Хизр бува зиёратгоҳида бўла туриб, зиёрат учун келган фуқаролар 54 ёшли М.У.нинг кийими чўнтагидан 600 минг сўм ва 41 ёшли С.Ш.нинг сумкасидан 500 минг сўм пулларни ўғирлаб, ҳодиса жойидан яширинган.
Ўтказилган тергов ҳаракатлари натижасида ушбу жиноятни муқаддам судланган 35 ёшли М.Э. исмли аёл содир этганлиги аниқланиб, процессуал тартибда ушланган ва унинг ёнидан чиққан 875 минг сўм пуллар холислар иштирокида ашёвий далил тариқасида расмийлаштириб олинган.
Риштон тумани ИИБ ҳузуридаги тергов бўлими томонидан Хизр бува зиёратгоҳида киссавурлик содир қилиб юрган шахсга нисбатан Жиноят кодексининг 169-моддаси 3-қисми «а» банди (ўғрилик) билан жиноят иши қўзғатилиб, тергов ҳаракатлар олиб борилмоқда.
Бундан аввал Марғилонда калити билан қолдирилган Spark’ни миниб қочган шахс қўлга олингани, Андижонда банкка ўғриликка тушган шахслар қўлга тушгани ҳамда Фарғонада ўзганинг пластик картасидан пул ўғирлаб, уларни тотализаторга тикиб юборган мактаб ўқувчиси судлангани ҳақида хабар берилганди.
Изоҳ (0)