Чехия бош вазири мамлакат соғлиқни сақлаш вазирини ишдан бўшатди

Чехия бош вазири Андрей Бабиш мамлакат соғлиқни сақлаш вазири Ян Блатнини ишдан бўшатишга қарор қилгани ҳақида хабар берди, деб ёзмоқда «Известия».

«Чехия соғлиқни сақлаш вазири лавозимини Прагадаги Буловца факультет шифохонаси директори Петр Аренбергер эгаллайди», — деди бош вазир.

Шу ўринда Блатнининг айтишича, Бабишнинг ушбу қарори сиёсий асосга эга ҳисобланади. Собиқ вазирнинг сўзларига кўра, у олинган маълумотларни чуқур таҳлил қилиш асосида иш олиб бориб, ўз лавозимига масъулият билан қараган.

Аренбергер коронавирус пандемияси даврида Соғлиқни сақлаш вазирлигини бошқарган тўртинчи раҳбар бўлади.

29 март куни мамлакатда коронавируснинг янги мутацияси аниқланди. Олимларнинг таъкидлашича, янги мутация вируснинг «британча» ва «жанубий африкача» штаммларидан анча хавфли. Мутахассислар янги штаммни ўрганишни давом эттирмоқда.

Worldometer’нинг маълумот беришича, 7 апрель ҳолатига кўра, Чехияда 1 560 777 киши коронавирус билан касалланди, уларнинг 27 329 нафари вирус қурбонига айланди. Пандемия бошидан буён 1 430 816 киши коронавирусдан соғайди.

Аввалроқ Бразилия президенти Жаир Болсонару ҳам Бразилия кардиологлар жамияти раҳбари, доктор Марселу Кейрога генерал Эдуардо Пазуэлланинг ўрнига соғлиқни сақлаш вазири лавозимига тайинланганини эълон қилди ва шу билан Кейрога мамлакатда коронавирус пандемияси даврида соғлиқни сақлаш вазири лавозимига тайинланган тўртинчи одам бўлди.

Словакия президенти Зузана Чапутова эса «Спутник V» вакцинасига оид можаро туфайли собиқ молия вазири Эдуард Хегерга янги ҳукумат тузишни буюрди.