Шерали Жўраевнинг қўшиғини куйлаб, муаллифлик ҳуқуқини бузгани айтилган СанЖай ушбу масалада судда ғалаба қозонганини маълум қилди (видео)

Шерали Жўраевнинг қўшиғини рухсатсиз куйлагани учун маъмурий жавобгарликка тортилгани айтилган СанЖай ушбу масала бўйича судда ғалаба қозонганини айтди.

«Ассалому алайкум, ҳурматли мухлисларим! Бугун менда сизлар учун жуда зўр хушхабар бор. Жиноят ишлари бўйича Навоий вилояти судида биз берган аппеляция бўйича иш кўриб чиқилди. Яъни ўша сиз севган ‘Карвон’ қўшиғи масаласи кўтарилди. Бу қўшиқни мен айтишга ҳаққим борми, кимнингдир ҳуқуқларини буздимми, жавобгарликка тортилишим керакми, йўқми, шу каби саволларга ойдинлик киритилиб, бу судда мен ғалаба қозондим. Демак, ‘Карвон’ қўшиғини ижро этишга ҳаққим бор», — дейди хонанда.

Маълумот учун, СанЖай 2020 йилнинг ноябрь ойида Шерали Жўраевнинг оиласи унга «Карвон», «Атиргулим», «Гулбадан» каби қўшиқларни айтишни тақиқлаганини маълум қилиб, «Ўзбекистонда бир-бирини кўра олмайди. Бутун дунёда ҳамма cover айтади, лекин Ўзбекистонда бир-биримизнинг оёғимизга болта урамиз, шунинг учун ҳеч қачон кўкармаймиз», деган эди.

Аввалроқ СанЖай ҳозирда бетоблиги айтилаётган Шерали Жўраевга Аллоҳдан шифо тилаб, фолловерларидан ҳофизнинг ҳаққига дуо қилиб қўйишларини сўраган эди.