Ижтимоий тармоқларда Тошкент бозорларида озиқ-овқат маҳсулотларига турнақатор навбатлар пайдо бўлгани ҳақида хабарлар пайдо бўлди.
Хусусан, «Авиасозлар» деҳқон бозорида ўсимлик ёғига узун навбат юзага келган. Қайд этилишича, арзонлаштирилган маҳсулотлар ярмаркасига яқинлашиб бўлмайди. Сабаби у ерда кунгабоқар ёғининг литри 14 500 сўмдан сотилмоқда. Бошқа жойларда эса бундай ёғнинг ўртача баҳоси 20 000 сўм атрофида.
Давлат статистика қўмитаси маълумотларига кўра, ўсимлик ёғининг ўртача нархи 17 фоиз кўтарилган. Ёғ-мой саноати корхоналари уюшмаси эса бу ҳолатни катта ҳажмда озиқ-овқат хом ашёларини етиштирадиган давлатлар экспорт ҳажмини камайтиргани билан боғлаб келади.
Қўмита томонидан 31 март куни ўтказилган кузатув натижалари бўйича, Тошкентдаги деҳқон бозорларида кунгабоқар ёғи 22 000 сўмгача нархда сотилгани қайд этилган.
Ёғ-мой саноат корхоналари уюшмаси раиси ўринбосари Қамариддин Серкаевнинг сўзларига кўра, Ўзбекистон аҳолисининг ўсимлик мойига бўлган йиллик талаби 475 минг тоннани ташкил этгани ҳолда, ёғ-мой корхоналари томонидан 259 минг тонна ишлаб чиқарилмоқда. Яъни талаб маҳаллий ишлаб чиқарувчилар томонидан 55 фоизга таъминланмоқда, ички бозор эҳтиёжининг 45 фоизи эса импорт ҳисобига қопланмоқда.
Изоҳ (0)