Бухоро вилояти Когон шаҳрида коронавирусга қарши курашда беморлар билан ишлаган 76 нафар тиббиёт ходимига 88 миллион сўмдан ортиқ 6 фоизли қўшимча тўловлар тўлаб берилмагани аниқланди, деб хабар беради ЎзА.
Адлия бўлими томонидан Когон шаҳар тиббиёт бирлашмасида ўтказилган мониторинг натижасида коронавирусга қарши курашиш бўйича беморлар билан ишлаш бўйича 76 нафар тиббиёт бирлашмаси ходимлари жалб этилганлиги, бироқ ушбу ходимларининг жами 88 млн 389 минг сўмлик 6 фоизли қўшимча тўловлари тўланмасдан қолганлиги аниқланган.
Таъкидланишича, фармонининг 17-банди Молия вазирлиги, Бандлик ва меҳнат муносабатлари вазирлиги Соғлиқни сақлаш вазирлиги билан биргаликда тиббиёт, санитария-эпидемиологик ва бошқа ходимлар коронавирус инфекцияси тарқалишига қарши курашиш тадбирларига жалб қилинадиган даврда уларнинг ойлик лавозим маошига 6 фоиз миқдорида ҳар кунлик қўшимча тўловлар тўлаб бериш топширилган.
«Адлия бўлими томонидан аниқланган қонун ҳужжатларининг бузилиши ҳолатлари ва уларнинг сабаблари ва бунга олиб келувчи шарт-шароитларни бартараф этиш юзасидан шаҳар тиббиёт бирлашмасига тақдимнома киритилди. Бироқ шаҳар тиббиёт бирлашмаси раҳбарияти томонидан 6 фоизли қўшимча тўловлар тўлаб берилмагач, Фуқаролик процессуал кодексининг 171-моддаси 5-бандига асосан, яъни ҳисобланган, лекин ходимга тўланмаган иш ҳақини ва унга тенглаштирилган тўловларни ундириш мақсадида Фуқаролик ишлари бўйича Когон туманлараро судига қарздордан қўшимча тўлов ундириш ҳақидаги ариза киритилди», – дейди Когон шаҳар адлия бўлими бош маслаҳатчиси Нодир Ҳошимов.
Киритилган таъсир чоралари натижасида жами 76 нафар тиббиёт бирлашмаси ходимларига юқорида келтирилган 6 фоизли қўшимча тўловлари тўлаб берилиши таъминланган.
Аввалроқ Тошкентда коронавирусга чалинган ҳамширадан олиб қолинган 12 миллион сўм миқдоридаги солиқ тўловлари ундириб берилгани, Нукусда коронавирусга чалинганлар касалхонасида ишлаган икки ҳамширанинг рағбатлантириш пуллари тўлаб бериладиган бўлгани тўғрисида хабар берилганди.
Маълумот учун, Ўзбекистонда коронавирус инфекциясидан зарарланган беморлар билан мулоқотга киришадиган, зарарланган беморлар жойлаштирилган объектларда ҳамда коронавирус инфекциясини аниқлаш лабораторияларида фаолият олиб бораётган тиббиёт ходимларига ҳар 14 кунлик фаолият даври учун махсус қўшимча рағбатлантириш тўлови белгиланган. Шунингдек, беморлар билан ишлаш давомида коронавирус инфекциясини юқтириб олган тиббиёт, санитария-эпидемиология хизмати ва бошқа ходимларга 100 миллион сўмдан тўланади.Коронавирус инфекциясига қарши курашиш доирасида беморлар билан ишлаган вақтида коронавирус инфекциясини юқтириш натижасида оғир аҳволга тушган ва соғлиғи тикланмаган тақдирда тиббиёт, санитария-эпидемиология хизмати ва бошқа ходимларга ёки уларнинг оила аъзоларига эса 250 миллион сўм миқдорида бир марталик тўловлар тўланади.
Изоҳ (0)