Калифорниядаги Platinum Motorsport устахонаси фотомодель ва актриса Ким Кардашьяннинг махсус буюртмаси асосида яратилган ноёб Cadillac Escalade ESV’нинг суратлари билан бўлишди, деб хабар беради Motor. Автомобиль ўзига хос KK Silver рангига бўялган ва йўлтанламасга ретро услубдаги 26 дюймли ғилдираклар кийгизилган.
Platinum Motorsport ательеси автомобилга киритилган ўзгартиришлар ҳақида батафсил маълумот бермаган: машина асосини янги авлод Escalade ESV ташкил этиши, бироқ йўлтанламас Кардашьян учун пасайтирилгани, орқа ярим сфераси ва оптикаси қорайтирилгани маълум халос. Майда катакли радиатор панжараси ва қора хром — Sport жамланмасидан далолат беради, аммо машина тўлиқ бўялгани сабаб бу ҳақда аниқ маълумот бериш мушкул.
Кумушранг KK Silver Ким Кардашьян шарафига номланган бўлиб, бўёқ силлиқланган алюминий кўринишига эга. Ўнта қисқа кегайга эга 26 дюймли дискалар ҳам айнан шу рангга бўялган. Афтидан, йўлтанламаснинг салони бутунлай ўзгартирилган, бироқ унинг интерьери суратлари эълон қилинмаган.
Cadillac Escalade ESV’нинг техник тавсифи ҳам ошкор этилмаган, бироқ гап тўрт болали оилага мўлжалланган автомобиль ҳақида кетаётган экан, тюнерлар машинанинг двигатель кучини оширмаган бўлиши керак. Тахминларга кўра, 5,8 метрли йўлтанламас капоти остидан 426 от кучини тақдим этишга қодир 5,8 литрли V8 бензин двигатели ўрин олган ва у 10 поғонали автомат узатмалар қутиси ёрдамида бошқарилади.
Тўлиқ ўлчамли Cadillac Escalade — америкалик юлдузлар орасида жуда машҳур. Масалан, Сильвестр Сталлоне буюртмасига асосан эски авлод йўлтанламаси ҳашаматли лимузинга айлантирилган эди. Актёр унда бир йилга яқин ҳаракатланган ва машинани 350 минг долларга сотиб юборган.
Мавзуга доир: Сирли Cadillac йўлтанламасининг дизайни ошкор бўлди
Изоҳ (0)