31-mart kuni Termiz xalqaro savdo markazi obyektlarini loyihalash, qurish va sotishni tashkil etish bo‘yicha tanlovga talabgorlardan kelib tushgan takliflar ko‘rib chiqildi, deb xabar beradi viloyat hokimligi matbuot xizmati. Prezident farmoniga ko‘ra, ushbu obyekt uchun O‘zbekiston tiklanish va taraqqiyot jamg‘armasidan 20 million dollar imtiyozli kredit ajratiladi.
Ma’lum qilinishicha, uchta kompaniya ushbu loyihada ishtirok etish niyatini bildirgan: Beijing Xinshiyuan Technology Development Co.Ltd, “Surxon sanoat-ta’minot” MChJ hamda “Fabullo Stroy Servis” MChJ.
Tanlovda “Surxon sanoat-ta’minot” MChJ tanlov g‘olibi deb topilgan. Mazkur kompaniya Termiz xalqaro aeroporti, Surxondaryo viloyat davlat arxivi binosi, Termiz tumanida 100 o‘rinli maxsus shifoxona va 1000 o‘ringa mo‘ljallangan bemorlarni vaqtinchalik saqlash obyektlarini qurgan.
Telegram’dagi “Davletovuz” kanali muallifining aniqlik kiritishicha, qariyb 33 milliard so‘mlik 100 o‘rinli maxsus shifoxona va 1000 o‘rinli vaqtinchalik karantinda saqlash majmuasini “Termiz-ta’minot sanoat qurilish ta’minoti” xususiy korxonasi qurgan. Mablag‘ Inqirozga qarshi kurashish jamg‘armasidan ajratilgan. Ushbu korxona “Surxon sanoat-ta’minot” kompaniyasi guruhiga kiradi.
Ta’kidlanishicha, tanlovda ishtirok etgan uchinchi kompaniya — “Fabullo Stroy Servis” MChJ ham ochiq ma’lumotlarga ko‘ra, “Surxon sanoat-ta’minot” qurilish kompaniyalari guruhiga kiradi. “Fabullo Stroy Servis” MChJ ta’sischilaridan biri hamda rahbari Qodirov Ulug‘bek To‘xtayevich, “Surxon sanoat-ta’minot” kompaniyasining bosh direktori Qodirov Bahodir To‘xtayevich.
Loyiha doirasidagi qurilish ishlari 2022-yilning 2-choragida yakunlanishi rejalashtirilgan.
Avvalroq Korrupsiyaga qarshi kurashish agentligi Navoiy va Andijondagi tenderlarga oid huquqbuzarliklar bo‘yicha hisobotni e’lon qilgani, Senatning o‘n uchinchi yalpi majlisida “Davlat xaridlari to‘g‘risida”gi qonun ma’qullangani to‘g‘risida xabar berilgandi.
Izoh (0)