Ўзбекистон Олий Мажлиси Сенати Мудофаа ва хавфсизлик масалалари қўмитаси Қорақалпоғистон Республикаси божхона бошқармаси тасарруфидаги «Даут-ота» чегара божхона постида юзага келган автотранспорт воситаларининг тирбандлигига оид ҳолатни ўрганди. Бу ҳақда Сенат ахборот хизмати хабар берди.
Ўрганиш натижасида «Даут-ота» чегара божхона пости орқали кириш ва чиқиш йўналишида ҳаракатланган автотранспорт воситаларининг оқими қуйидаги омиллар сабаб кўпайгани аниқланган:
- пандемия шароитида Туркманистонда карантин тадбирларининг кучайтирилгани ҳамда Туркманистон ҳудуди орқали автотранспорт воситаларининг ҳаракати чеклангани сабабли автотранспорт воситалари Ўзбекистон—Қозоғистон—Россия—Грузия—Туркия йўналишида ҳаракатланмоқда;
- қиш мавсумида ҳаво ҳароратининг кескин пасайиб кетиши натижасида Қозоғистоннинг Ақтўбе вилояти Иргиз қишлоғи орқали ўтувчи йўлнинг музлаши, шунингдек, Россиянинг жанубий вилоятларига юкни етказиб берувчи ташувчилар учун «Даут-ота» чегара божхона пости орқали ҳаракатланиш қулай бўлмоқда (масофанинг қисқалиги ва йўл харажатларининг камлиги);
- Ўзбекистон билан Туркия давлати ўртасида имзоланган келишувга асосан, ташқи савдо юкларини ташувчи томонлар автотранспорт воситалари учун қулайлик ва енгилликлар яратилгани сабабли Туркия давлати ҳудуди орқали Ўзбекистон ташувчиларининг ҳаракатланиши кўпайган.
Ўз навбатида, ўзбек—қозоқ давлат чегарасида юзага келаётган тирбандликни бартараф этиш мақсадида Қозоғистон томони билан Давлат божхона қўмитаси раҳбарияти даражасида ҳар ҳафта, масъул бошқармалари даражасида ҳар куни, божхона пости даражасида ҳар икки соатда мулоқот қилиниб, бир-бирига кўмаклашган ҳолда тезкорлик билан мавжуд муаммолар ечими топилмоқда.
Сенатнинг Мудофаа ва хавфсизлик масалалари қўмитаси ўзбек—қозоқ давлат чегарасида юзага келаётган тирбандликни бартараф этиш бўйича олиб борилаётган ишларни назоратга олган.
Аввалроқ ИИВ ЙҲХББ Чиноздан ўтган автомобиль йўлида юзага келаётган тирбандликлар бўйича маълумот бериб, М-39 автомобиль йўлининг 862-километрида жойлашган йўл ўтказгич кўприкда таъмирлаш ишлари олиб борилаётгани маълум қилганди.
Изоҳ (0)