Тошкентда қурилиш компанияси томонидан ўз уйидан мажбуран чиқариб юборилган Мавжуда Маматқосимова исмли аёл вафот этди, деб хабар беради «Подробно».
Маълумотларга кўра, Мавжуда Маматқосимова пойтахтнинг Олтинтепа кўчасидаги (собиқ Сиалковский кўчаси) уйида оиласи билан яшаб келган. 2019 йилда BB-stroy компанияси мавжуд икки қаватли уйни бузиб, унинг ўрнида кўп қаватли турар жой биносини қуриш бўйича Тошкент ҳокими Жаҳонгир Ортиқхўжаевнинг рухсатини олган. Шунда Мавжуда Маматқосимова таклиф этилаётган компенсацияга рози бўлмаган, бироқ қурилиш компанияси фуқаролик ишлари бўйича Мирзо Улуғбек судидан оилани мажбуран кўчириш борасидаги қарорни олишга эришган.
Таъкидланишича, икки йил давом этган руҳий стресс оқибатида аёл комага тушган ва 28 март куни вафот этган.
«Мен нима қилишни билмаяпман. Фарзандларимни бир ўзим катта қилганман, давлатдан ҳеч қандай ёрдам олган эмасман. Фақат ўзимга ишониб, ҳеч кимдан бирор нарса сўрамаганман. Ҳеч ким тиланчилик қилмаяпти, югурмаяпти. Қандай қилиб менинг хусусий мулкимни олиб қўйиш мумкин? Квартирамни 2004 йилда шахсий пулларимга сотиб олганман», — деган эди Маматқосимова яқинда берган интервьюсида.
Мавзуга доир:
Изоҳ (0)