O‘zbekistonda Koreya va Yevropaga ishga yuborishni va’da qilib, fuqarolarning pullarini o‘zlashtirgan International Job Organization xususiy bandlik agentligi rahbarlari ustidan sud hukmi e’lon qilindi.
Oliy sud matbuot xizmatining ma’lum qilishicha, 23-mart kuni jinoyat ishlari bo‘yicha Shayxontohur tuman sudida xususiy bandlik agentligi rahbarlari va unga aloqador shaxslarga nisbatan jinoyat ishini ko‘rib chiqish bo‘yicha ochiq sud jarayoni nihoyasiga yetdi.
E’lon qilingan sud hukmiga ko‘ra, International Job Organization ta’sischisi va direktori Sh.Abdurahmonovga 9 yil 6 oy ozodlikdan mahrum qilish jazosi tayinlandi.
International Job Organization’ning:
- Andijon viloyati filiali menejeri G.Dumanovaga 6 yil 1 oy;
- Xorazm viloyati filiali rahbari G‘.Hasanovga 8 yil 1 oy;
- Toyloq tumani filiali rahbari J.Pardayevga 8 yil 1 oy;
- Surxondaryo viloyati filiali rahbari J.Tursunovga 8 yil 1 oy;
- Jizzax shahar filiali rahbari X.Urazoliyevga 8 yil 1 oy;
- Namangan shahar filiali rahbari D.Islomovaga 6 yil 1 oy ozodlikdan mahrum qilish jazosi tayinlangan.
Ushbu bandlik agentligiga aloqador bo‘lgan “Yarkoe Budusheye” rahbari Sh.Nosirovga 8 yil, JB World Company rahbari B.Jalolovga 9 yil 6 oy ozodlikdan mahrum qilish jazosi tayinlangan.
Ularning barchasi jazoni umumiy tartibli koloniyalarda o‘tashi belgilandi. A.Salmonovga (ishsiz) 2 yil muddatga axloq tuzatish ishlari jazosi tayinlangan.
Oliy sud matbuot xizmatining qayd etishicha, jinoyat oqibatida 2368 nafar jabrlanuvchiga yetkazilgan 17 063 069 928 so‘m moddiy zarar sudlanuvchilar Sh.Abdurahmonov, B.Ochilov, G.Dumanova, J.Pardayev, X.Urazoliyev, A.Ahmadjonov, D.Islomova, G‘.Hasanov, J.Tursunov, A.Shukurov, B.Po‘latov va B.Jalolovdan solidar tartibda undirilishi belgilandi.
Jinoyat oqibatida 6 nafar jabrlanuvchiga yetkazilgan 172 545 183 so‘m moddiy zarar sudlanuvchilar Sh.Nosirov va B.Jalolovdan solidar tartibda undirilishi belgilandi.
Sudlanuvchi B.Jalolovdan jabrlanuvchi S.Hamidovning foydasiga 26 264 800 so‘m va O.Qobilovning foydasiga 34 669 536 so‘m undirilishi belgilandi.
Jinoyat ishi yuzasidan xatlangan 1 104 778 352 so‘m pul va 12 678 426 462 so‘mga baholangan mol-mulklar proporsional tartibda yetkazilgan moddiy zararni qoplashga qaratilishi hamda undirilishi lozim bo‘lgan zarar miqdoridan chegirilishi belgilandi.
Eslatib o‘tamiz, 1993-yil Qirg‘izistonda tug‘ilgan, fuqaroligi bo‘lmagan Sh.Abdurahmonov Toshkent shahar, Yunusobod tumani, Ahmad Donish ko‘chasi, 2-mavzeda joylashgan faoliyat turiga ko‘ra O‘zbekistondan tashqarida ish izlovchi fuqarolarni xorijiy davlatda ishga joylashtirish, bo‘sh ish o‘rinlari haqida ma’lumotlar berish hisoblangan International Job Organization xususiy bandlik agentligi uchun 2019-yilning 19-aprel kuni Bandlik va mehnat munosabatlari vazirligidan litsenziya olib, jamiyatga rahbarlik qilib kelgan.
Jamiyat tashkil topgan kundan bugungi kunga qadar firibgarlik yo‘li bilan o‘zgalarning mulkini qo‘lga kiritishni maqsad qilib, respublikaning barcha viloyatlarida vakolatxona ochgan. Turli OAV orqali jamiyat haqida e’lonlar berib, bosh ofis va vakolatxonaga ishga joylashish bo‘yicha murojaat qilib kelgan fuqarolarni Janubiy Koreya va Yevropa davlatlariga ishga yuborishini va’da qilgan.
Ammo bugungi kunga qadar ushbu xususiy bandlik agentligi tomonidan birorta ham fuqaro O‘zbekistondan tashqarida ishga joylashtirilmagan.
Izoh (0)