Сирдарёдаги ўрмон хўжалигининг салкам 150 гектар майдони ёниб кетди

Ижтимоий тармоқларда Сирдарё вилоятидаги «Қолгансир ўрмон-ов хўжалиги» ерлари сунъий равишда ёқиб юборилаётганлиги ҳақида хабарлар тарқалди. Унда қуёнлар ва қушлар эса тириклайин ёниб кетаётганлиги, заҳарли илонлар аҳолига яқин жойларда кўпайиб кетгани айтилган.

Сирдарё вилоят Экология ва атроф-муҳитни муҳофаза қилиш бошқармаси матбуот хизмати бунга расмий муносабат билдирди. Қайд этилишича, воқеа бошқарма томонидан жойига чиқиб ўрганилган бўлиб, ёнғин 19 март куни «Қолгансир ўрмон-ов хўжалиги» майдонининг 147,2 гектар майдонида содир бўлгани аниқланган. Кучли ёмғир ёғганлиги сабабли ёнғин ўша куннинг ўзида ўчган.

Сирдарё вилоят Ички ишлар бошқармаси томонидан ёнғин чиқиш сабаблари ва етказилган зарар миқдори аниқланмоқда. Батафсил маълумотлар қўшимча тарзда маълум қилиниши билдирилган.

Эслатиб ўтамиз, 2020 йилнинг июнида Сурхондарёдаги «Сурхон» давлат қўриқхонасида 35 гектар майдонда, июлида Самарқанд вилоятидаги «Зарафшон» табиат миллий боғида 2 минг квадрат метр майдонда, сентябрь ойида Сурхондарё вилояти Шеробод туманидаги «Қизириқ» ўрмон хўжалигида 50 гектар майдонда ёнғинлар кузатилгани ҳақида хабар берилган эди. Ноябрь ойида эса Қашқадарё вилоятида Қамаши тумани ҳудудида жойлашган ўрмон хўжалигида ёнғин юз бериб, салкам 600 та Зарафшон арчаси ёниб кетганди.