Қоҳирада 9 қаватли бино қулаб тушди, 22 киши ҳалок бўлди (фото)

Миср пойтахти Қоҳира марказидаги тўққиз қаватли бино қулаши оқибатида ҳалок бўлганлар сони 22 кишига етди, деб ёзади «РБК».

El Balad нашри маълумотларига кўра, жабрланганлар сони ҳам ўсган: 25 киши жароҳат олган. Қутқарувчилар бедарак йўқолган уч кишини қидиришда давом этмоқда.

Қоҳирадаги бино 27 март куни эрталаб қулаб тушган эди. Дастлаб ҳодиса оқибатида уч киши ҳалок бўлиб, 23 киши жабрланган эди. Жароҳатланганларнинг барчаси Ас-Салом касалхонасига етказилган. Воқеа жойида куни бўйи қутқарувчилар ва махсус техника иш олиб борган. Мутахассислар ушбу уйга ёндош биноларни кўздан кечириб, уларнинг қулаш хавфини баҳолади.

Қоҳира муҳофазаси вайроналар остидан одамларни қидириш ишлари давом этаётганини маълум қилди.

Шаҳар губернатори, генерал майор Холид Абдул Ал прокуратура текширувни якунлаганидан кейин дарҳол вайронгарчиликдан етган зарарни таҳлил қилиш учун муҳандислик қўмитаси тузишни буюрди.

Нашр ёзишича, бундай воқеалар камёб ҳисобланмайди. Экспертлар қайд этишича, Қоҳирада иншоотларнинг 40 фоизи рўйхатдан ўтказилмаган ва стандартларга жавоб бермайди. Биринчи навбатда бу камбағал даҳалардаги иншоотларга тегишли.