Microsoft компанияси асосчиси, мултимиллиардер Билл Гейтс АҚШ ва Буюк Британиянинг пандемия бошида йўл қўйган энг катта хатолари ҳақида гапирди. Бу ҳақда у Wyborcza газетаси ва TVN телеканалига интервью берди, деб ёзмоқда «Korrespondent.net».

Фото: AP Photo

Гейтснинг сўзларига кўра, ўзи каби бир неча киши «озгина харажат эвазига тайёргарлик кўриш ва муаммолардан қочиш мумкин», деб огоҳлантирганига қарамай, беморларга имкон қадар тезроқ ташхис қўйиш учун бундай инвестициялар киритилмади.

«ПЦР технологияси аниқ тест натижаларига эга бўлишга имкон беради, агар эпидемиянинг дастлабки босқичида етарлича одам синовдан ўтказилса ва ижобий натижа берганлар карантинга олинса, у ҳолда кенг кўламли локдаунга сабаб бўлувчи коронавирус билан касалланиш сони ортишининг олдини олиш мумкин», — деб таъкидлади у.

Унинг сўзларига кўра, Австралия, Жанубий Корея ва Янги Зеландия шундай йўл тутди.

«Европанинг катта қисми, Жанубий Америка ва АҚШ бундай қилмади, бунинг учун катта бадал тўладик», — деб қўшимча қилди Гейтс.

Вақтида киритилган инвестициялар вазиятни сақлаб қолиши мумкин эди, унда бунчалик харажатлар келиб чиқмас эди, деб ишонч билдирди миллиардер.

«Агар дунё етакчилари бунга олдиндан тайёргарлик кўрганида ёки ҳеч бўлмаганда, тестлар сонини кузатиб бориш ва изоляцияни назорат қилишни маслаҳат берадиган соҳа олимларига мурожаат қилганида, бизда ҳали ҳам имкон бўлар эди ва давлатлар бу муаммо билан анча самаралироқ курашаётган бўларди», — деб шикоят қилди Гейтс.

Бу ҳолат такрорламаслиги учун юзага келган вазиятдан хулоса чиқариш орқали инвестиция киритиш кераклигини таъкидлади Microsoft асосчиси.

Аввалроқ Билл Гейтс янги турдаги коронавирусдан тўлиқ ҳимояланиш учун уч босқичли эмлаш талаб қилиниши мумкинлигини айтди. Унга кўра, вакцинанинг учинчи дозаси таркиби янги мутацияларни ҳисобга олган ҳолда такомиллаштирилган бўлади.

Шунингдек, у пандемия 2022 йилдан олдин тугамаслигини айтди. Унинг сўзларига кўра, ҳозирда пандемияга қарши кўрилаётган чоралар етарли эмас. Шунингдек, у дунёда коронавирусга қарши вакцинанинг шунча тез яратилгани ва оммавий вакцинация бошланганини мўъжиза деб атади.