Microsoft asoschisi Bill Geyts yaqin besh yil ichida iqlim o‘zgarishiga qarshi kurashish loyihasi uchun 2 milliard dollar investitsiya kiritadi. Bu haqda milliarderning Handelsblatt nashriga bergan intervyusiga tayanib “Korrespondent.net” xabar berdi.

Foto: AP Photo

Geytsning fikriga ko‘ra, jahon sanoati atom energiyasidan voz kechmasligi kerak, chunki quyosh va shamol kabi muqobil energiya manbalari global elektr energiyasiga bo‘lgan ehtiyojni qondirish uchun yetarli emas. Shuningdek, Geytsning atmosferadan karbonat angidrid gazini filtrlab olish texnologiyasidan umidi katta.

Global isish haqida gapirar ekan, Geyts iqlimni to‘lib-toshgan vannaxonaga qiyosladi.

“Jo‘mrakni butunlay yopgan taqdirda ham, u tomchilaydi va bir kun kelib vanna to‘lib ketadi”, — dedi u.

Avvalroq Bill Geyts insoniyat uchun eng katta xavf haqida gapirgan edi. U 2015-yildayoq koronavirusga o‘xshagan, nafas yo‘llari virusi keltirib chiqaradigan yangi pandemiya ehtimoli haqida ogohlantirgan edi.