Microsoft kompaniyasi asoschisi, multimilliarder Bill Geyts AQSh va Buyuk Britaniyaning pandemiya boshida yo‘l qo‘ygan eng katta xatolari haqida gapirdi. Bu haqda u Wyborcza gazetasi va TVN telekanaliga intervyu berdi, deb yozmoqda “Korrespondent.net”.
Geytsning so‘zlariga ko‘ra, o‘zi kabi bir necha kishi “ozgina xarajat evaziga tayyorgarlik ko‘rish va muammolardan qochish mumkin”, deb ogohlantirganiga qaramay, bemorlarga imkon qadar tezroq tashxis qo‘yish uchun bunday investitsiyalar kiritilmadi.
“PZR texnologiyasi aniq test natijalariga ega bo‘lishga imkon beradi, agar epidemiyaning dastlabki bosqichida yetarlicha odam sinovdan o‘tkazilsa va ijobiy natija berganlar karantinga olinsa, u holda keng ko‘lamli lokdaunga sabab bo‘luvchi koronavirus bilan kasallanish soni ortishining oldini olish mumkin”, — deb ta’kidladi u.
Uning so‘zlariga ko‘ra, Avstraliya, Janubiy Koreya va Yangi Zelandiya shunday yo‘l tutdi.
“Yevropaning katta qismi, Janubiy Amerika va AQSh bunday qilmadi, buning uchun katta badal to‘ladik”, — deb qo‘shimcha qildi Geyts.
Vaqtida kiritilgan investitsiyalar vaziyatni saqlab qolishi mumkin edi, unda bunchalik xarajatlar kelib chiqmas edi, deb ishonch bildirdi milliarder.
“Agar dunyo yetakchilari bunga oldindan tayyorgarlik ko‘rganida yoki hech bo‘lmaganda, testlar sonini kuzatib borish va izolyatsiyani nazorat qilishni maslahat beradigan soha olimlariga murojaat qilganida, bizda hali ham imkon bo‘lar edi va davlatlar bu muammo bilan ancha samaraliroq kurashayotgan bo‘lardi”, — deb shikoyat qildi Geyts.
Bu holat takrorlamasligi uchun yuzaga kelgan vaziyatdan xulosa chiqarish orqali investitsiya kiritish kerakligini ta’kidladi Microsoft asoschisi.
Avvalroq Bill Geyts yangi turdagi koronavirusdan to‘liq himoyalanish uchun uch bosqichli emlash talab qilinishi mumkinligini aytdi. Unga ko‘ra, vaksinaning uchinchi dozasi tarkibi yangi mutatsiyalarni hisobga olgan holda takomillashtirilgan bo‘ladi.
Shuningdek, u pandemiya 2022-yildan oldin tugamasligini aytdi. Uning so‘zlariga ko‘ra, hozirda pandemiyaga qarshi ko‘rilayotgan choralar yetarli emas. Shuningdek, u dunyoda koronavirusga qarshi vaksinaning shuncha tez yaratilgani va ommaviy vaksinatsiya boshlanganini mo‘jiza deb atadi.
Izoh (0)