Сейшел ороллари ҳукумати 25 март куни карантин ва вакцинация сертификати талаб қилишни бекор қилиб, чет эллик сайёҳлар учун чегараларни очди. Бу ҳақда «Интерфакс» хабар берди.
Аввалроқ Сейшел оролларининг ташқи ишлар ва туризм вазири Силвестр Радегонде сайёҳлар келишининг янги тартибида давлатга кириш олдидан коронавирусга қарши фақат ПЗР-тест талаб этилишини айтган эди. У сертификатланган лабораториядан учиб келишдан кўпи билан 72 соат олдин олиниши керак. Ҳужжат инглиз тилида, асл нусхадаги муҳр билан қоғоз кўринишида бўлиши лозим.
Бундан ташқари, сайёҳлар Сейшел оролларининг соғлиқни сақлаш ва туризм департаментларидан мажбурий тиббий рухсатнома олиш учун seychelles.govtas.com сайтига ариза бериши керак.
Ариза топшириш пулли: катталар учун 45 евро, 12 ёшгача бўлган болалар учун беш евро. Сайтга паспорт маълумотлари, рейс, яшаш жойи, коронавирус тести натижалари ва тиббий суғурта киритилади. Аризани кўриб чиқиш вақти олти соатдан ошмайди.
Аввалроқ Сейшел оролларининг туризм бўйича бош котиби Анн Лафортюн таъкидлаганидек, сайёҳлар 538 та сертификатланган меҳмонхоналарнинг исталганидан хона банд қилиши мумкин, шунингдек, ижтимоий масофа ва ниқоб тақиш тартибига амал қилиш лозим.
Аввалроқ Сайёҳлар учун тўлиқ очиқ бўлган мамлакатлар номи маълум қилинди. Унга кўра, ҳозир дунёда хорижий сайёҳлар учун коронавирус билан боғлиқ чекловларсиз фақат бешта мамлакат мавжуд. Шунингдек, 69 та мамлакат аввалгидек кириш учун ёпиқ. Ушбу маълумот Жаҳон сайёҳлик ташкилоти (UNWTO) томонидан берилган ҳисоботда эълон қилинди.
Шунингдек, Туркияда «хавфсиз туризм дастури» доирасида туризм ходимларини коронавирусга қарши режадан ташқари бепул эмлаш бошланди.
«Хавфсиз туризм дастури» яқинлашиб келаётган сайёҳлик мавсумида чет эллик сайёҳларни кутиб олиш ҳамда соҳа вакиллари ва туб аҳолининг саломатлигини таъминлаш учун ишлаб чиқилган.
Изоҳ (0)