Организмда шакар миқдорининг ошиши нафақат вазн ортиши ва тери билан боғлиқ муаммолар, балки бошқа жиддий оқибатларга ҳам олиб келади. Эрта қаришга унинг қўшадиган ҳиссаси ҳақида-ку гапирмаса ҳам бўлаверади. Табиийки, бир бўлак торт билан инсоннинг юзига ажин тушиб қолмайди, аммо мунтазам равишда истеъмол қилинса, бу ташқи кўринишда ҳам акс этади.
Кўплаб тадқиқотларда шакар ташқи ва ички қариш жараёнини тезлаштириши аниқланган. Терининг таранглигига иккита асосий модда — коллаген ва эластин жавоб беради. Глюкоза билан реакцияга киришганда коллаген шикастланади. Натижада терининг таранглиги йўқолади, ажин, пигмент ва доғлар пайдо бўлади, регенерация жараёни сустлашади. Ташқи ўзгаришлардан ташқари шакар ички аъзолар, хусусан, юрак-қон томир тизими фаолиятида ҳам муаммолар келтириб чиқаради.
Албатта, қариш табиий жараён ҳисобланади, аммо глюкозанинг ошиши ушбу жараённи жадаллаштириб юборади. Айнан шу сабаб ҳам парҳезшунослар ширинликлардан тийилиш ва истеъмол қилишда назорат бўлиш кераклигини таъкидлайди. Биринчи навбатда қўшимча шакардан воз кечиш керак. Бу вазн ортишига олиб келадиган қуруқ калориядан бошқа нарса эмас. Шакари табиий йўл билан ҳосил бўладиган сабзавот ва меваларда унинг салбий таъсири зарарини қоплаши мумкин бўлган клетчатка ва антиоксидантларга бой бўлади.
Шакардан воз кечиш организмга қандай фойда беради?
Биринчи навбатда, бир неча ҳафтадан кейин терининг ранги, саломатлиги ва ялтираши яхшиланади. Иккинчидан, кишининг ўзини ҳис қилиши ҳам ижобий томонга ўзгаради. Чарчоқ камаяди ва киши ўзини энергияга тўла ҳис қила бошлайди. Учинчидан эса келажакда пайдо бўлиши мумкин бўлган хавфли ва сурункали касалликларнинг олди олинади.
Изоҳ (0)