Нозик қад-қомат ҳамда чиройли кўринишга эга бўлиш истаги кўпинча ақл-идрокни ҳам енгиб ўтади. Ва баъзида даҳшатли оқибатларга ҳам олиб келади. Шунинг учун кўр-кўрона парҳезларга риоя қилиш туфайли нималар юз бериши билан танишиб чиқинг.
Метаболизм секинлашуви
Метаболизм ёки содда қилиб айтганда, организмда содир бўладиган моддалар алмашинуви жараёни ҳаётни таъминлаш учун зарур бўлган кимёвий реакцияларнинг мураккаб жараёнидир. Маълумки, метаболизм қанча фаол бўлса, вазн ташлаш ҳам шунча тез рўй беради. Шунинг учун кўплаб аёллар ортиқча килограммдан тезроқ халос бўлиш ниятида озиқ-овқат истеъмолини кескин равишда чеклайди. Айнан натижа кутилганидек бўлиши ҳам мумкин. Аммо таъсир узоқ вақт давом этмайди. Кераклича вазн ташлангач, парҳездан узоқлашиш ҳолати кузатилади. Сўнгра калориялар ҳисоби ҳақида унутилади ва яна вазн орта бошлайди.
Иммунитет тизимининг заифлашуви
Ҳеч кимга сир эмаски, қаттиқ парҳез тутиш иммунитет тизимининг заифлашувига олиб келади. Ҳар қандай овқатдан танани маҳрум қилиш орқали керакли витаминлар етишмовчилиги пайдо бўлади. Бу эса ўз навбатида маълум бир касалликнинг ривожланишига сабаб бўлади. Шунинг учун мутахассислар барча муҳим витаминларни истеъмол қилиш орқали аста-секин вазн ташлашга ёрдам берадиган парҳезга риоя қилишни маслаҳат беради.
Тери ҳамда соч ҳолатининг ёмонлашиши
Ортиқча вазндан қутулиш ниятида бўлганлар тери ҳамда соч ҳақида ҳам унутмаслиги лозим. Чунки минерал ва витаминлар етишмаслиги ташқи кўринишга аниқ таъсир ўтказади. Порлоқ рангини йўқотган сочлар, тошмаларга тўлган тери амалдаги парҳезнинг тана учун зарарли эканлигидан дарак беради. Натижада соғлиққа салбий таъсир этиш билан бирга, тери ва сочнинг сифати ҳам бузилиши мумкин.
Танадаги чизиқли белгилар
Афсуски, парҳез тутган ҳар иккинчи аёл теридаги чизиқларга дуч келади. Гарчи вазн йўқотиш тўрт килограммдан ортмаса ҳам, ушбу муаммо юзага чиқиши мумкин. Бунинг учун парҳез давомида оддий қоидаларга амал қилиш лозим:
- массаж;
- терини намлантириш;
- контрастли душ қабул қилиш.
Кўпинча елка, қорин ва кўкрак қафаси соҳаларида терининг осилиши кузатилади. Ва бу муаммога 15 килограммда ортиқ вазн йўқотган ҳар бир киши дуч келади. Бундай ҳолда фақат пластик жарроҳлик ёрдамга келиши мумкин. Шунингдек, косметологик муолажалар ёрдамида тери осилишининг олдини олиш ҳам мумкин.
Изоҳ (0)