Манеж, ходунок ва болаларга мўлжалланган бошқа воситалар: нима учун уларни сотиб олмаслик керак?

Кўпгина ота-оналар манеж, юришни ҳамда сакрашни ўргатадиган воситаларни жуда қулай ҳамда хавфсиз деб билади. Аммо масаланинг иккинчи томони ҳам бор.

Уларнинг фикрига кўра, махсус воситалар кўп жой эгалламайди ва болаларни йиқилишдан сақлайди. Болани ушбу қурилмага жойлаштиргач ортиқча ташвишланишнинг кераги йўқ. Она хотиржамлик билан ўз юмушини бажаради. Ушбу масалани батафсил ёритиб беришда терапевт, «Болалар танаси» мактабининг яратувчиси ва болалар саломатлиги бўйича китоблар муаллифи Артём  Ранюшкин ёрдам беради.

«Кўпинча болалар учун мўлжалланган асосий буюмлар жиддий муаммоларни келтириб чиқаради. Манеж, ходунок ва бошқа болалар буюми уларнинг саломатлигига зарар етказиши мумкин. Ушбу маҳсулотлар жуда кўп реклама қилинади. Ота-оналар эса айнан ушбу воситалардан фойдаланиш шарт, деб билади. Қуйида уларнинг фойдасидан кўра зарарли томонлари бисёр эканини билиб олиш мумкин.

Манеж

Ота-она боланинг йиқилиши ва шикастланишидан ҳимоя қилади, деган умидда боласига манеж харид қилади. Аммо кичкина ва ёпиқ манеж кўпроқ болага зарар беради.

• Биринчидан, болада руҳий ноқулайлик пайдо бўлади.
• Иккинчидан, кичкина бўшлиқ ҳали эмаклашни билмайдиган болага кўтарилишни ўргатади.

Бола манеж панжарасини қўллари билан ушлаб, ҳали суяги мўрт оёғида тик турмоқчи бўлади. Вақт ўтиши билан бу каби ҳаракатлар оёқда жиддий муаммолар пайдо бўлишига олиб келади. Шунинг учун болани кўп вақт манежда қолдирмасдан, эркин ҳаракатланиши учун кенгроқ жойни топиш керак.

Ходунок

Чақалоқ ҳали мушакларини бошқариш имкониятига эга бўлмагани сабабли у оёқларига тўғри суянмайди. Бу ўз навбатида бўғимнинг гипермобилияси – бўғимларнинг ҳаддан ташқари ҳаракатчанлигини ва оёқларнинг қийшайиб қолишига сабаб бўлади. Бундан ташқари бола оёқлари ўртасида қўшимча чеклов билан ҳаракатланади. Шу сабабдан тиззалар ташқарига бурилади ва валгус деформацияси юз беради. Оёқлар зарар кўрганидан сўнг умуртқа поғонаси ҳам рисоладагидек бўлмайди.

Сакроғич

Бола сакроғичда бўлганида унинг умуртқа поғонаси сиқилади. Бу ҳолатда бел ва думғаза мушаклари қисқаради. Шундан сўнг «қурбақа позаси» пайдо бўлади. Бола ўтирганида оёқларнинг W шаклидаги ҳолати ва тос суягининг ҳаддан ташқари бурилиши кузатилиши мумкин.

Бундан ташқари, ҳали тик туролмайдиган боланинг сакраши оёқлар учун яхши эмас. Шу орқали оёқларда:

• бармоқ учида юриш;
• валгус деформацияси;
• варус деформацияси кузатилади.

Шунинг учун ҳам болага муддатидан аввал сакрашни ўргатмаслик лозим. Улар буни ўзи қила олгунча кутиш керак. Акс ҳолда, оғриқли ва узоқ муддатли терапияни талаб этадиган қаттиқ эгрилик юз бериши хавфи мавжуд. Ёш болалар учун турли хил ускуналар сотиб олишдан аввал мутахассислар билан маслаҳатлашиш зарур. Тинимсиз реклама қилинган барча нарса ҳам чақалоқ учун керак бўлмайди. Энг аввало, фарзанд саломатлигига эътиборли бўлиш лозим.