«Севимли» телеканалининг «Хайрли оқшом» дастури 150 та давлатнинг байроғини ёд олган 6 ёшли қизалоқ – Омина ҳақида ҳикоя қилди.
Омина болалигидан қўлига берилган қоғозга турли шаклдаги расмлар чизган. Онасининг сўзларига кўра, у Оминага ёзишни 1 ёшидан бошлаб ўргатган. 4 ёшида эса бўғинлаб ўқишни бошлаган. Шунингдек, оила фарзандларини машғулотларга мажбурламайди. Улар вақтида овқатланишга ва ўйнашга ҳам вақт ажратади.
«Байроқларнинг ранги бор, давлатларнинг номи бор. Икки-учта параметрларга боғлиқ ҳолда боланинг дунёқараши шаклланиб, хотираси кучайиши учун байроқ ёдлашни танлаганмиз», − дейди Оминанинг дадаси Азамат Эшбеков.
«200 дан ортиқ давлат бўлса, ҳозирда 150 тасини ёд олган ва ёдлашда яна давом этмоқда. Бунинг яна бир ижобий томони шундаки, давлатлар ҳақида унинг байроғи орқали ҳам тушунчага эга бўлади. Байроқлар номини ёдлаб ҳам дунёда шундай давлат борлигини билиб олади. Бу ҳам қайсидир маънода боланинг дунёқарашини оширишга ёрдам беради деб ўйлайман», − дейди қизалоқнинг онаси Зарифа Яхшиликова.
«Ингилизча гапиришни билмайман, фақатгина сўзларини биламан. Рус тилида эса сўзлаша оламан. Биз карточкалар олганмиз, ойим ёзувини беркитиб туради ва давлат номини айтади, мен эса ўша давлатнинг байроғини топишим керак», − дейди Омина Эркинова.
Дастлаб қизалоққа ота-онаси томонидан давлат пойтахтлари ўргатилган, лекин у бунга бироз қийналган. Ўша пайтда Омина 3 ёшда эди. Кейинчалик давлат байроқларида ранглар, шакллар, белгилар борлиги учун қизиқиб, ўрганиб олган. Ҳозирда Омина йўл ҳаракати белгиларига қизиқмоқда ва уларни ўрганишни ҳам бошлаб юборган.
Изоҳ (0)