Билл ва Эстер Илнски биргаликда деярли 70 йил умр кечирди. Март ойида жуфтлик Палм-Бич округининг шифохонасида бир неча дақиқа фарқ билан коронавирусдан вафот этди, деб ёзмоқда Tengrinews.
Жуфтликнинг 67 йиллик юбилейига бир неча кун қолган эди. Уларнинг асраб олган қизи Сара Милевскийнинг айтишича, ота-онаси ёшлигида танишган.
«Билл Детройтда ўсган ва 16 ёшида ҳаётини Худога бағишлашга қарор қилган. У Марказий Библия коллежига, Миссури штатининг Спрингфилд шаҳридаги Яратган Бирлашмасига боради. Кейинчалик у яқин атрофдаги черковларда воизлик қилади ва пианиночига эҳтиёж сезади. Дўстлари унга Эстерни олишни маслаҳат берган. Шу тариқа ота-онам танишган ва бир-бирини севиб қолган», — деди Милевски.
Қизининг сўзларига кўра, севишганлар кўп ўйлаб ўтирмай турмуш қуришга қарор қилган.
«Отам онамга турмуш қуришни таклиф қилганида: ‘Эстер, мен сенга катта бойлик ваъда бера олмайман, лекин кўплаб саргузаштларни ваъда беришим мумкин’ деган экан», — ҳикоя қилди қизи.
Билл ваъдасида турди. Эр-хотин Ўрта Ғарбда черков очди. Кейин 10 йил Ямайкада яшади. Кейинчалик Ливанга кўчиб ўтди. Лекин жуфтлик Байрутда ҳарбий ҳаракатлар бошланганидан кейин эвакуация самолётига зўрға улгуриб, АҚШга қайтди.
АҚШга қайтгач, Билл Илнски Вест-Палм-Бичдаги черков руҳонийси бўлди, Эстер эса болаларга ибодатни ўргатувчи Esther Network International’га асос солди.
«Отам уч йил олдин нафақага чиққан эди. Ўз ёшига нисбатан соғлом бўлса-да, кексаликнинг баъзи аломатларидан азият чекарди. Онам эса ҳали ҳам ўз вазифасини видеоалоқа орқали бажарар эди», — қўшимча қилди Милевски.
Пандемия бошлангач, Саранинг ота-онаси эҳтиёт чораларини кўрди. Унинг онаси уйида ўзини яккалади, лекин отаси вақти-вақти билан кўчага чиқиб турди, чунки ўзини яккалаш тартибига кўника олмади. Авлиё Валентин кунида улар қариндошлариникига борди ва шундан кейин коронавирус билан касалланди.
Февраль ойининг охирида Сара ва унинг турмуш ўртоғи ота-онасини шифохонага ётқизишга қарор қилди. Шифохона ходимлари уларни ажратмай, битта палатага жойлаштирди. Март ойида Эстер вафот этди, ундан 15 дақиқа ўтиб унинг турмуш ўртоғи Билл ҳам ҳаётдан кўз юмди.
«Улар ҳамиша бирга бўлди ва биргаликда кўз юмди», — деди Милевски.
Изоҳ (0)