АҚШнинг Техас штатида кутубхонадан олинган китоб 82 йил ўтиб қайтарилди. Бу ҳақда UPI хабар берди.
Френсис Брюс Страй қаламига мансуб “Сизнинг болангиз, унинг оиласи ва дўстлари” номли китоб 1943 йил июлида Сан-Антонио жамоат кутубхонасидан ўқиш учун олинган. Китобхон уни 28 кун ичида қайтариш керак эди. Бироқ нусха орадан 82 йил ўтиб, 2025 йил июнида Орегон штатидан посилка орқали жўнатилган.
Илова қилинган хатда китоб жўнатувчининг отасига тегишли буюмлари орасидан топилгани, эҳтимол, уни хат муаллифининг бувиси олгани айтилган. Кутубхона 2021 йилда кечиктириб қайтарилган китоблар учун жаримани бекор қилгани сабабли, бу сафар ҳам ҳеч қандай тўлов олинмаган. Август охирида эса китобни эски китоблар дўконида сотувга қўйиш режалаштирилмоқда.
Бу АҚШда китобнинг орадан йиллар ўтиб кутубхонага қайтарилиши бўйича биринчи ҳолат эмас. Масалан, 2024 йилда Нью Жерси штатидаги Патерсон жамоат кутубхонасига Уилям Шекспирнинг “Генрих V” песаси 101 йил ўтиб қайтарилганди.
Изоҳ (0)