КХДР фуқароси Мун Чхве Мюн Малайзиядан АҚШга экстрадиция қилинди. Бу ҳақда АҚШ Адлия вазирлиги веб-сайтига таяниб, «РБК» хабар берди.
Бу Шимолий Корея фуқаросининг АҚШга экстрадиция қилиниши бўйича биринчи ҳолат, дея таъкидлади АҚШ департаменти. 55 ёшли эркак 1,5 миллион доллардан кўпроқ пулни «ювишда» айбланмоқда.
«У қонунларни бузгани учун АҚШга экстрадиция қилинган тарихдаги илк Шимолий Корея разведкасининг ходими ва иккинчи чет эл разведкачисидир», — дейилади баёнотда.
Айблов хулосаси ва суднинг бошқа қайдларга кўра, Мун Чхве Мюн 2013 йил апрелидан 2018 йил ноябригача «АҚШ молия тизимига махфий ва фирибгарлик йўли билан кириш мақсадида» бошқалар билан тил бириктириб келган. Сохта ном остидаги банк ҳисоб рақамлари ва компаниялардан ниқоб сифатида фойдаланиб, улар орқали КХДР фойдасига операцияларни сир тутишга муваффақ бўлган.
Мун Чхве Мюн ва унинг шериклари Америка банкларини доллар билан боғлиқ операцияларни ўтказишга мажбур қилган, чунки амалдаги санкциялар туфайли уларнинг ўзи буни амалга оширолмасди.
Мун Чхве Мюн АҚШ ва БМТнинг Пхенянга қарши санкцияларини бузганликда айбланмоқда. Бундан ташқари, айбланувчи Шимолий Корея разведкаси билан алоқада бўлган.
2020 йил 22 ноябрда КХДР фуқароси Колумбия округидаги федерал судга олиб келинган.
Reuters хабарига кўра, Малайзия суди 2019 йил декабрь ойида Федерал қидирув бюросининг (ФҚБ) Шимолий Корея фуқаросини экстрадиция қилиш тўғрисидаги талабини қондирган. Малайзияда яшовчи шимолий кореялик тадбиркор тақиқланган қимматбаҳо молларни Сингапурдан КХДРга етказиб берганликда ва БМТ санкцияларини бузганликда айбланган.
Шимолий Корея бунга жавобан Малайзия билан дипломатик алоқаларни узаётганини маълум қилди. Корея Марказий телеграф агентлиги томонидан келтирилган КХДР Ташқи ишлар вазирлигининг баёнотида айтилишича, бу ҳодиса «АҚШнинг душманлик сиёсатидан келиб чиққан ҳолда Кореяни изоляция қилиш ва бўғиб ўлдиришга қаратилган, шунингдек, Малайзия ҳукуматининг Америкага лаганбардорлик сиёсати оқибатидаги Кореяга қарши фитнанинг очиқдан очиқ кўринишидир».
Изоҳ (0)