Bill va Ester Ilnski birgalikda deyarli 70 yil umr kechirdi. Mart oyida juftlik Palm-Bich okrugining shifoxonasida bir necha daqiqa farq bilan koronavirusdan vafot etdi, deb yozmoqda Tengrinews.
Juftlikning 67 yillik yubileyiga bir necha kun qolgan edi. Ularning asrab olgan qizi Sara Milevskiyning aytishicha, ota-onasi yoshligida tanishgan.
“Bill Detroytda o‘sgan va 16 yoshida hayotini Xudoga bag‘ishlashga qaror qilgan. U Markaziy Bibliya kollejiga, Missuri shtatining Springfild shahridagi Yaratgan Birlashmasiga boradi. Keyinchalik u yaqin atrofdagi cherkovlarda voizlik qiladi va pianinochiga ehtiyoj sezadi. Do‘stlari unga Esterni olishni maslahat bergan. Shu tariqa ota-onam tanishgan va bir-birini sevib qolgan”, — dedi Milevski.
Qizining so‘zlariga ko‘ra, sevishganlar ko‘p o‘ylab o‘tirmay turmush qurishga qaror qilgan.
“Otam onamga turmush qurishni taklif qilganida: ‘Ester, men senga katta boylik va’da bera olmayman, lekin ko‘plab sarguzashtlarni va’da berishim mumkin’ degan ekan”, — hikoya qildi qizi.
Bill va’dasida turdi. Er-xotin O‘rta G‘arbda cherkov ochdi. Keyin 10 yil Yamaykada yashadi. Keyinchalik Livanga ko‘chib o‘tdi. Lekin juftlik Bayrutda harbiy harakatlar boshlanganidan keyin evakuatsiya samolyotiga zo‘rg‘a ulgurib, AQShga qaytdi.
AQShga qaytgach, Bill Ilnski Vest-Palm-Bichdagi cherkov ruhoniysi bo‘ldi, Ester esa bolalarga ibodatni o‘rgatuvchi Esther Network International’ga asos soldi.
“Otam uch yil oldin nafaqaga chiqqan edi. O‘z yoshiga nisbatan sog‘lom bo‘lsa-da, keksalikning ba’zi alomatlaridan aziyat chekardi. Onam esa hali ham o‘z vazifasini videoaloqa orqali bajarar edi”, — qo‘shimcha qildi Milevski.
Pandemiya boshlangach, Saraning ota-onasi ehtiyot choralarini ko‘rdi. Uning onasi uyida o‘zini yakkaladi, lekin otasi vaqti-vaqti bilan ko‘chaga chiqib turdi, chunki o‘zini yakkalash tartibiga ko‘nika olmadi. Avliyo Valentin kunida ular qarindoshlarinikiga bordi va shundan keyin koronavirus bilan kasallandi.
Fevral oyining oxirida Sara va uning turmush o‘rtog‘i ota-onasini shifoxonaga yotqizishga qaror qildi. Shifoxona xodimlari ularni ajratmay, bitta palataga joylashtirdi. Mart oyida Ester vafot etdi, undan 15 daqiqa o‘tib uning turmush o‘rtog‘i Bill ham hayotdan ko‘z yumdi.
“Ular hamisha birga bo‘ldi va birgalikda ko‘z yumdi”, — dedi Milevski.
Izoh (0)