Ўзбекистон Президенти Шавкат Мирзиёев 23 март куни халқаро консультантлар — Альфред Гузенбауэр, Александр Квасьневский ва Штефан Фюлени қабул қилди. Бу ҳақда Президент матбуот хизмати хабар берди.
Қайд этилишича, халқаро консультантлар гуруҳининг асосий вазифаси Ўзбекистоннинг Евроиттифоқ давлатлари билан кўп қиррали ҳамкорлигини ривожлантириш ва кенгайтиришга, ислоҳотлар дастурини амалга оширишда хорижнинг тажрибасини ўрганиш ва жорий этишга, инвестиция ва ишбилармонлик муҳитини такомиллаштиришга, мамлакат иқтисодиётига тўғридан-тўғри инвестициялар ва илғор технологияларни жалб қилишга, Европа ишбилармон доиралари билан шерикликнинг самарали механизм ва воситаларини шакллантиришга кўмаклашишдан иборат.
Таъкидланишича, турли йилларда юксак давлат лавозимларини эгаллаган консультантлар бугунги кунда Европадаги расмий, ишбилармон ва жамоатчилик доираларида юқори халқаро нуфузга эга бўлиб, етакчи консалтинг, инвестиция ва саноат компанияларида ишлаб, салмоқли тажриба тўплаган.
Хусусан, Gusenbauer Projektentwicklung & Beteiligung консалтинг компаниясининг таъсисчиси Альфред Гузенбауэр 2000 йилларда Австрия Федерал канцлери бўлиб фаолият юритган. Amicus Europae фонди раҳбари Александр Квасьневский Польша президенти бўлган. Бугунги кунда CITIC Europe Holdings компанияси маслаҳатчиси сифатида фаолият кўрсатаётган Штефан Фюле Европа Иттифоқининг кенгайиш ва яхши қўшничилик сиёсати масалалари бўйича комиссари лавозимида муваффақиятли ишлаган.
Учрашувда мамлакатни ислоҳ қилиш ва институционал жиҳатдан ривожлантиришнинг долзарб масалалари юзасидан очиқ ва конструктив фикр алмашилди.
Меҳмонлар Ўзбекистонда амалга оширилаётган янгиланишлар дастурини юқори баҳолади ва тўлиқ қўллаб-қувватлади. Айниқса, коронавирус пандемияси билан боғлиқ мураккаб шароитларда олиб борилаётган ижтимоий-иқтисодий сиёсатнинг ютуқлари ва аниқ натижалари, шунингдек, Ўзбекистоннинг глобал ва минтақавий иқтисодий жараёнларга интеграциялашуви сари сезиларли саъй-ҳаракатлари алоҳида қайд этилди.
Консультантларнинг Ўзбекистонда иқтисодий ислоҳотларнинг узоқ муддатли стратегиясини тайёрлаш, давлат бошқаруви тизимини янада такомиллаштириш, мамлакатнинг хорижий шериклар билан ўзаро манфаатли муносабатларини кенгайтиришга доир тавсиялари кўриб чиқилди.
Ўзбекистонда инвестиция муҳитини яхшилаш ва унинг шаффофлигини ошириш, бозор механизмларини кенг жорий этиш ва рақобат муҳитини шакллантириш, банк-молия соҳаси ва капитал бозорини ривожлантиришга алоҳида эътибор қаратилди.
Консультантлар, шунингдек, иқтисодиётнинг изчил трансформация қилинаётгани ва хорижий капитал учун очиқлиги ортаётгани туфайли Евроиттифоқ мамлакатлари билан инвестиция ва инновациялар борасидаги ҳамкорликни кенгайтириш учун катта имкониятлар шаклланаётганини қайд этди.
Ўзбекистон билан ЕИ ўртасидаги ҳамкорликнинг бугунги юксак даражасини сақлаш, ўзаро манфаатли алоқаларни мустаҳкамлаш ва амалий мазмун билан бойитиш, кенгайтирилган шериклик ва ҳамкорлик тўғрисидаги битимни тез фурсатда қабул қилиш ҳамда мамлакатнинг Жаҳон савдо ташкилотига қўшилишини қўллаб-қувватлаш масалалари устувор аҳамиятга эга экани таъкидланди.
Савдони либераллаштириш ҳамда ўзаро товар айирбошлаш ва инвестицияларни кўпайтиришга тўсқинлик қилаётган ғовларни бартараф этиш, бозорларга чиқиш масалаларида ҳамкорлик қилиш механизмлари ҳам кўриб чиқилди.
Учрашув якунида яқин ҳамкорлик ва фаол алмашинувларни давом эттириш тўғрисида келишувга эришилди. Яқин истиқболдаги амалий ҳамкорликнинг биринчи галдаги вазифалари ва формати келишиб олинди.
Бундан аввал Шавкат Мирзиёев «Шоввозсой» ҳақидаги гап-сўзларга муносабат билдиргани, мамлакатдаги дипломатик миссияси якунланган Россия элчисини қабул қилгани ҳамда Ўзбекистон—Қирғизистон чегарасини делимитация ва демаркация қилиш бўйича қирғиз ҳукумати делегацияси раҳбари Тошкентга келгани ҳақида хабар берилганди
Изоҳ (0)