Ўзбекистон халқ артисти Юлдуз Усмонова «Халқлар дўстлиги» саройида 10–25 март кунлари «Юрак» деб номланган навбатдаги яккахон концерт дастурини тақдим этмоқда.
Концерт дастурининг биринчи кунида саҳнага ўрнатилган чироқ узилиб кетди. Ушбу вазиятда Юлдуз Усмонова сарой хизматчиларидан чироқ бўлакларини супуриб, тозалаб олишларини, агар тозалаб олишмаса, раққосаларнинг оёғи шикастланиб, зарар етиши мумкинлигини айтди.
Қизиқчи Шукрулло Исроилов эса «ҳаттоки саҳна чироғи ҳам Юлдуз Усмонованинг овозига бардош бермай, портлаб кетди. Чироқ ҳам Юлдуз Усмоновани соғиниб турган экан, ‘мана Юлдуз келди, чироғимни бераман’, деди-ю, ёрилиб кетди», дея вазиятни қўлга олди.
Ушбу ҳолат бўйича концерт бош режиссёри ва продюсери Мансур Агалиев қуйидагича фикр билдирди.
Концерт дастурларимиз тарихида энг қийин кун шу йилги дастуримизнинг биринчи куни бўлди. «Тепадан шиша чироқ узилиб тушди», дейишди. У чироқ яхшигина катта бўлиб, агар бошга тушганда жуда жиддий иш бўлар эди. Шокка тушиб қолдим. «Сарой хизматчисини олиб чиқ», десам, у хизматчи кийимидамасман, деяпти.Шундай вазиятда Шукрулло Исроилов ва Юлдуз Усмонова импровизация қилишди. Келган томошабинлар бу уюштирилган ҳолат, дея нотўғри тахминга ҳам боришибди.
Жонли концерт бўлганидан сўнг кимдир йиқилиб тушади, монитор ишламай қолиши ёки бир бошқа ҳолатлар бўлиши мумкин. Жонли ижродаги концертларнинг завқи ҳам шунда бўлса керак.
Мансур Агалиев, Юлдуз Усмонованинг продюсери
Изоҳ (0)