Тошкентдаги Абдулла Қодирий боғида Hampton by Hilton меҳмонхонаси қурилади. 20 март куни Hampton by Hilton Tashkent Park Abdula Kodiri номланувчи ушбу меҳмонхона пойдеворига вақт капсуласини қўйиш тантанали маросими бўлиб ўтди, деб хабар бермоқда пойтахт ҳокимлиги матбуот хизмати.
Абдулла Қодирий истироҳат боғи ҳудудида меҳмонхона қурилиши ҳақида 2019 йилнинг ноябрида маълум бўлганди. Ўшанда Тошкент шаҳар ҳокимлиги бу борада япон компанияси билан келишувга эришилганини билдирганди. Ушбу қарор ижтимоий тармоқларда кенг муҳокамаларга сабаб бўлган, аксарият ижтимоий тармоқ фойдаланувчилари ушбу қарорни қоралаганди.
Пойтахт ҳокимлиги матбуот хизмати хабарида қурувчи ва инвестори сифатида Қозоғистоннинг BI Group компанияси кўрсатилган бўлиб, инвестициялар миқдори 100 миллиард сўмдан ортиқни ташкил қилади. Меҳмонхонадан 120 хона ва бизнес-марказ ўрин олади. Лойиҳа 2021 йилнинг май ойида бошланиб, 2022 йил июнь ойида фойдаланишга топширилади.
Меҳмонхона пойдеворига вақт капсуласини қўйиш тантанали маросимида Тошкент шаҳар ҳокимининг ўринбосари — Инвестиция ва ташқи савдо бошқармасининг бошлиғи Шароф Раҳмонов, Олмазор тумани ҳокими Абдумажид Муллажонов, Мurad Buildings асосчиси Мурод Назаров ва BI Group компанияси вакиллари — Қозоғистоннинг Ўзбекистондаги элчихонаси маслаҳатчи-элчиси Қанат Ҳасенов ва BI Group директорлар кенгашининг раиси Айдин Раҳимбаев иштирок этган.
Январь ойида Тошкент марказида бошқа Hampton by Hilton меҳмонхонаси қурилаётгани ҳақида хабар берилган эди. Меҳмонхона энди қурилаётганига қарамай, унга оид маълумот «Яндек.Харита»да пайдо бўлган. Объект Истиқбол кўчасида, KFC ресторани ёнида, Халқаро Вестминистер университети рўпарасида жойлашган.
Маълумот учун, BI Group — инновацион қурилиш холдинги Қозоғистон кўчмас мулк бозорида етакчи бўлиб, ўз фаолиятини 1995 йилдан амалга ошириб келмоқда. Дунёнинг энг йирик қурилиш компаниялари ENR Top 250 Global Contractors рейтингига киради.
Hampton by Hilton Tashkent Park Abdula Kodiri — BI Group ва Hilton Worldwide’нинг тўртинчи қўшма лойиҳасидир.
Ўтган йил давомида BI Group холдинги томонидан Hilton Worldwide билан Марказий Осиёда 10 та Hampton by Hilton меҳмонхоналарини қуриш бўйича келишув имзоланди, улардан бири Тошкентдаги меҳмонхона бўлади.
Изоҳ (0)