АҚШ Россияни қурол савдоси бутунлай тақиқланган мамлакатлар рўйхатига киритди. Бу ҳақда Давлат департаментининг сайтида эълон қилинган ҳужжатга таяниб, «Korrespondent.net» хабар берди.
Тегишли қарор 18 мартдан кучга киради.
«Қўшма Штатлар сиёсати Россия учун мўлжалланган мудофаа техникалари ва мудофаа хизматлари экспорти учун лицензиялар ёки бошқа рухсатномаларни беришни рад этишдан иборат», — дейилади ҳужжатда.
Давлатларнинг космик соҳада ҳамкорлиги доирасидаги операциялар ва 1 сентябргача тижорий космик парвозлар учун истиснолар мавжуд.
Россиядан ташқари, рўйхатга Афғонистон, Марказий Африка республикаси, Кипр, Конго демократик республикаси, Эритрея, Ироқ, Ливан, Ливия, Сомали, Жанубий Судан ва Зимбабве давлатлари ҳам киритилган.
Бундан ташқари, АҚШ Савдо вазирлиги Алексей Навальний туфайли Россияга экспорт чекловларини кенгайтириш тўғрисида хабар берди ва 18 мартдан бошлаб Россияга қарши янги савдо чекловларини жорий қилди.
Маълумот учун, 2 март куни Евроиттифоқ ва АҚШ Навальний иши юзасидан Россияга қарши санкциялар киритган эди. Россия бош прокурори Игор Краснов, Тергов қўмитаси раҳбари Александр Бастрикин, Росгвардия раҳбари Виктор Золотов ва Жазоларни ижро этиш федерал хизмати директори Александр Калашников санкциялар таъсирига учради. Уларнинг Евроиттифоққа кириши тақиқланади, шунингдек, уларнинг Евроиттифоқ ҳудудидаги активлари музлатиб қўйилади.
«АҚШ давлат котибининг 2021 йил 2 мартдаги Россия ҳукумати ўз фуқароларига қарши кимёвий ёки биологик қурол ишлатгани тўғрисидаги хулосаларига мувофиқ, Саноат ва хавфсизлик бюроси Россияга экспорт бўйича чекловларни кенгайтиради», — дейилади ҳужжатда.
Шу муносабат билан, 18 мартдан миллий хавфсизлик масаласи сабабли, назорат остида бўлган буюмлар экспортининг лицензиялари учун аризаларни кўриб чиқишда «рад этиш презумсияси» амалда бўлади.
Навальний иши бўйича «қора рўйхат»га 14 та ташкилот киритилган. Улар 13 та тижорат компанияси (9 таси Россияда, 3 таси Германияда, биттаси Швейцарияда) ва Россиянинг давлат тадқиқот институти.
Аввалроқ ОАВ АҚШ Россия ҳукуматига тегишли хакерларнинг кенг кўламли киберҳужуми учун Россияга қарши янги санкциялар киритгани ҳақида хабар берган эди.
БМТ мутахассисларининг фикрига кўра, АҚШнинг фавқулодда ҳолатларга таяниб эълон қилган бир томонлама санкциялари Россия, Хитой, Венесуэла ва бошқа давлатларда инсон ҳуқуқларининг кенг кўламда бузилиши ҳисобланади.
Мавзуга доир:
Изоҳ (0)