Фарғона вилоят судида 2021 йил 16 март куни «Сўх воқеалари» юзасидан очилган жиноят иши бўйича навбатдаги суд мажлиси бўлиб ўтди, деб хабар берди «Дарё» мухбири Азизжон Эрматов.
Судья Тожиддин Ваҳобов раислигида давом эттирилган суд ишида 2020 йилнинг май ойида вилоятнинг Сўх тумани Чашма қишлоғида қўшни давлат фуқаролари билан сув масаласида келиб чиққан оммавий тартибсизликлар юзасидан айбланган 22 нафар судланувчининг охирги сўзи эшитилган.
Судланувчилар ўз сўзида қилган ишидан пушаймонлигини, ўша куни воқеа жойида бўлганидан афсусдалигини айтиб, суд ҳайъатидан енгиллик беришни сўраган.
Маълум қилинишича, суд ишининг музокаралар жараёнида Сўх туманидан вилоят кенгашига сайланган депутат ҳамда Ёшлар иттифоқи туман кенгаши вакили сўз олиб, сўхлик ёшларни кафилликка олишини билдирган.
Суд ишига таклиф этилган сўхлик имом ҳам ёшларни доимий назорат қилишини ва уларнинг тарбияси билан жиддий шуғулланишини айтиб, суд раисидан энгиллик беришни илтимос қилган.
Прокурор судланувчиларга нисбатан озодликдан маҳрум қилиш билан боғлиқ жазо тайинлашни, уларни суд залидан қамоққа олишни ва жазо умумий колонияда ўталишини сўраган.
Эслатиб ўтамиз, вилоятнинг Сўх тумани Чашма қишлоғида қўшни давлат фуқаролари билан сув масаласидаги можарода иштирок этган 22 нафар шахсга нисбатан қўзғатилган жиноят ишини судда кўриб чиқиш жараёни 2020 йил 9 ноябрь куни бошланган эди. Шундан сўнг 23—30 ноябрь кунларига тайинланган суд мажлислари айрим сабабларга кўра белгиланган вақтда ўтказилмади.
Жиноят иши доирасида 9 нафар шахсга нисбатан қамоққа олиш ва 13 нафар шахсга уй қамоғи эҳтиёт чораси қўлланилган. Судланувчилар орасида икки нафар вояга етмаган шахс ҳам бор. Судда вояга етмаган судланувчиларнинг қонуний вакиллари иштироки таъминланган.
Ушбу жиноят иши доирасида дастлабки тергов органи томонидан 22 нафар шахсга Жиноят кодексининг 219-моддаси 2-қисми (ҳокимият вакилига ёки фуқаровий бурчини бажараётган шахсга ўзининг хизмат вазифасини бажариш ёки фуқаровий бурчини бажаришдан воз кечишга, шунингдек, қонунга хилоф ҳаракатлар содир этишга мажбур қилиш) ва 244-моддаси (оммавий тартибсизликлар) билан айблов эълон қилинган.
Жиноят ишини кўриб чиқиш давомида 22 нафар судланувчи, 36 нафар жабрланувчи ва 21 нафар гувоҳ сўроқ қилинган.
Таъкидланишича, «Сўх воқеалари»га оид жиноят иши бўйича суд муҳокамаси очиқлик ва шаффофлик тамойиллари асосида олиб борилиб, суд ишида кенг жамоатчилик ва оммавий ахборот воситаларининг иштироки тўлиқ таъминланмоқда.
Изоҳ (0)