“So‘x voqealari”da ayblanayotganlar navbatdagi sud majlisida dastlabki ko‘rsatmalarini rad etdi

Jinoyat ishlari bo‘yicha Farg‘ona viloyat sudida 2020-yil 14-dekabr kuni “So‘x voqealari” yuzasidan ochilgan jinoyat ishi bo‘yicha navbatdagi sud majlisi bo‘lib o‘tdi, deb xabar berdi “Daryo” muxbiri.

Dastlab himoyachi Burhon Mamajonov sudlanuvchilarga nisbatan ehtiyot chorasini o‘zgartirish bo‘yicha sudga iltimosnoma kiritgan. Advokat So‘x tumanidan olib kelinayotgan 13 nafar shaxsning xulq-atvoridan kelib chiqib ularga tayinlangan ehtiyot chorasini bekor qilishni taklif qilgan. Sud mazkur masala bo‘yicha maslahatga kirgan va iltimosnomani rad etgan.

Sudya Tojiddin Vahobov raisligida davom ettirilgan sud ishida sudlanuvchilar Bahodir Shodiyev, Yodgor Jo‘rayev, Shahzod Mahmadaliyev, Zaylobidin Zaylobov va Shahrombek Olimovlar 31-may kun sodir bo‘lgan voqea bo‘yicha so‘roq qilingan.

Sudlanuvchi Bahodir Shodiyev dastlabki tergovda o‘ziga qo‘yilgan ayblovlarni rad etgan. U 31-may kuni Chashma qishlog‘iga janjalda ishtirok etish uchun emas, balki opasining uyiga borganini, opasi bilan birgalikda kasalxonada yotgan akasini ko‘rgani bormoqchi bo‘lganini, soat 14:30-15:00 larda o‘sha yerga ketayotganda viloyat hokimi ishtirokida yig‘ilish bo‘layotganini ko‘rganini aytgan. Va o‘sha kungi voqealarda umuman qatnashmaganligini ta’kidlagan.

“Ko‘chaga chiqsam, hamma Chashma bulog‘i tomonga ketyapti. Qirg‘izlar bilan o‘zbeklar o‘rtasida janjal chiqqanini eshitdim. Lekin men janjalda qatnashmaganman. Chashmadagi janjalda ishtirok etmagan bo‘lsam, nega bu yerdaman? Haligacha tushuna olmayapman”, — degan sudlanuvchi Bahodir Shodiyev.

Sudlanuvchi Yodgor Jo‘rayev o‘z ko‘rsatmasida janjal sodir bo‘lgan kuni dalada bo‘lganini, onasi kasal bo‘lib shifoxonaga tushib qolgani uchun soat 18:00 larda shifoxonaga borganini aytgan. U yerda uni Chashmadagi janjalda jarohat olganlar va ularning yaqinlari ko‘rgan. Ichki ishlar xodimlari shifoxonaga kelib, to‘planganlarni tarqatib yuborganini aytib, janjalda qatnashmaganini ta’kidlagan.

“31-may kuni dalada edim. Onamning qon bosimi oshib ketib kasalxonaga tushib qolgandi. Daladan kelib, kasalxonaga ketdim. Kasalxonaga borsam tez yordam mashinalarida yaralanganlar olib kelinayotgan ekan. U yerda odam juda ko‘p edi. IIB xodimlari to‘planganlarni tarqatishga urinardi. Kasalxonada ertalab soat 7:00 dan 7:30 gacha bo‘ldim. Menga kasalxonadagi tartibsizliklarda qatnashganimni aytishyapti. Lekin men unda qatnashmaganman”, — deb ko‘rsatma berdi sudlanuvchi Yodgor Jo‘rayev.

Qayd etilishicha, Yodgor Jo‘rayev dastlabki tergov organi so‘roqnoma bayonnomalarida ichki ishlar xodimlari kelgan avtobusga tosh otgani, tuman IIB binosiga borgani, amakisining o‘g‘li tan jarohati olib, shifoxonada yotgani kabi holatlar bo‘yicha ko‘rsatmalar bergan.

Shundan so‘ng sudlanuvchilar Shahzod Mahmadaliev, Zaylobidin Zaylobov hamda Shahrombek Olimovning 31-may kuni Chashma bulog‘ida yuz bergan voqealar bo‘yicha ko‘rsatuvlari tinglangan.

Sudlanuvchilarning ko‘rsatmalari tinglangach, advokatlar va prokuratura xodimlari ularga savollar bilan murojaat qilgan.

Sud ishida 2020-yil 18-dekabrga qadar tanaffus e’lon qilindi.

Eslatib o‘tamiz, viloyatning So‘x tumani Chashma qishlog‘ida qo‘shni davlat fuqarolari bilan suv masalasidagi mojaroda ishtirok etgan 22 nafar shaxsga nisbatan qo‘zg‘atilgan jinoyat ishini sudda ko‘rib chiqish jarayoni 2020-yil 9-noyabr kuni boshlangan edi. Shundan so‘ng 23—30-noyabr kunlariga tayinlangan sud majlislari ayrim sabablarga ko‘ra, belgilangan vaqtda o‘tkazilmadi.

Jinoyat ishi doirasida 9 nafar shaxsga nisbatan qamoqqa olish va 13 nafar shaxsga uy qamog‘i ehtiyot chorasi qo‘llanilgan. Sudlanuvchilar orasida ikki nafar voyaga yetmagan shaxs ham bor. Sudda voyaga etmagan sudlanuvchilarning qonuniy vakillari ishtiroki ta’minlangan.