Қашқадарё вилоятининг Қарши шаҳрида ўзини ҳокимлик ходими деб таништирган шахс имтиёзли уй олмоқчи бўлган икки аёлнинг ҳар биридан 500 доллар пулни фирибгарлик йўли билан олгани аниқланди. Бу ҳақда ИИВ Тергов департаменти хабар берди.
Маълум бўлишича, 4 февраль куни 26 ёшли эркак Р.М. Қарши шаҳар ҳокимлиги биносида фуқаролар 46 ёшли аёл Д.Б. ва 37 ёшли аёл Д.А.га ўзини ҳокимликнинг мурожаатлар бўлими ходими деб таништирган ва уларга келгусида бошланғич тўлови тўланмайдиган, кам таъминланган фуқароларга имтиёз асосида бериладиган уй-жойлар олишларида ёрдам беришини ваъда қилган.
У аёлларнинг ҳар биридан 500 доллардан, жами 1000 долларни рўйхатга олинганликлари учун давлат божи тўлови сифатида дея алдов йўли билан олиб, ўз эҳтиёжларига ишлатиб юборган.
Олиб борилган терговга қадар текширув ҳаракатлари давомида Р.М. ҳеч қаерда ишламаганлиги сабаб шаҳар ҳокимлигида жамоат ишларига ёрдам бериши мақсадида жалб қилиниб, иш ўрганаётганлиги, мурожаатлар бўлимига келган фуқароларнинг энг нозик муаммоларини билиб олиб, осон пул топиш мақсадида ушбу жиноятни содир қилгани аниқланган.
Мазкур ҳолат юзасидан Қарши шаҳри бўйича ИИО ФМБ ҳузуридаги тергов бўлими томонидан Р.М.га нисбатан Жиноят кодексининг 168-моддаси (фирибгарлик) 3-қисми «б» банди билан жиноят иши қўзғатилган ва у процессуал тартибда ушланган.
Ҳозирда тергов давом этмоқда.
Аввалроқ Наманганда 1 миллиард сўм имтиёзли кредит талон-торож қилингани аниқлангани, «Ҳар бир оила — тадбиркор» дастури доирасида 155 миллион сўмлик кредит маблағларини талон-торож қилган тадбиркорга жиноят иши қўзғатилгани, Зангиотада «Ёшлар — келажагимиз» жамғармаси раҳбарлари катта суммадаги кредит маблағларини талон-торож қилгани аниқлангани ҳақида хабар берилган эди.
Изоҳ (0)