Ўзбекистонда ҳар 100 кишига 8 та енгил автомобиль тўғри келиши маълум бўлди

Ўзбекистонда 2021 йилнинг 1 январь ҳолатига кўра, жисмоний шахсларга тегишли жами енгил автомобиллар сони 2 767 126 тани ташкил этмоқда. Бу ҳақда Давлат статистика қўмитаси хабар берди.

Маълум қилинишича, ҳар 100 нафар доимий аҳолига ўртача 8 та енгил автомобиль тўғри келмоқда.

Жисмоний шахсларга тегишли бўлган енгил автомобилларнинг энг кўпи Тошкент шаҳрига тўғри келмоқда — 467 176 та.

Республика бўйича жисмоний шахсларга тегишли қолган енгил автомобиллар сони ҳудудлар кесимида қуйидагича:

• Самарқанд вилояти — 323 586 та;
• Фарғона вилояти — 276 558 та;
• Тошкент вилояти — 262 741 та;
• Қашқадарё вилояти — 223 733 та;
• Андижон вилояти — 192 944 та;
• Хоразм вилояти — 187 457 та;
• Бухоро вилояти — 180 478 та;
• Наманган вилояти — 180 367 та;
• Сурхондарё вилояти — 150 574 та;
• Қорақалпоғистон — 113 140 та;
• Навоий вилояти — 75 039 та;
• Жиззах вилояти — 72 530 та;
• Сирдарё вилояти — 60 803 та.